مملکت ملی امنیت باشلیغی رحمتالله نبیل، قندوز شهری طالبلر قولیگه اوتگنی توغریسیده، خلق و پارلمان نمایندهلریدن عذر سورهدی.
جناب نبیل، چهارشنبه کون ایچکی ایشلر وزیری نورالحق علومی، مدافعه وزیرلیگی سرپرستی معصوم استانکزی بیلن مجلسده چقیریلگن ایدی. اونگه کوره، حاضر امنیتی کوچلر قندوزده یخشی یوتوقلرگه ایریشگن.
عین حالده، مملکت امنیتی رسمیلرینینگ ایتیشیچه، قندوز واقعهسی خصوصیده ایلگریدن خبردار ایکن، بیراق حکومت رهبرلری طالبلرگه قرشی امنیتی کوچلر عملیات قیلیشگه بویروغ بیرمهگن. اوشبو رسمیلر چهارشنبه کون نمایندهلر کینگشی ییغینیده، یاپیق ایشیکلر آرقهسیده خبرچیلردن یاشیرین بو مطلبنی بیان ایتکن.
پارلمان اعضالریدن بیری فرهاد صدیقینینگ خبرچیلرگه ایتیشیچه، مملکت ایچکی ایشلر وزیری نورالحق علومی مجلسده چقیریلیب ایتیشیچه، قندوز اوستیگه اویوشتیریلگن هجومدن خبردار ایکن، بیراق حکومت باشلیغلری تامانیدن بویروغ بیریلمهگنی باعث، عکس العمل کورستمهگن.
جناب صدیقیگه کوره، ایچکی ایشلر وزیری عملیات یولگه قوییشنی صلاحیتیدن یوقاریب دیب و بو ایش مملکت ملی خوفسیزلیک کینگشی و جمهور رییس بویروغی اساسیده، عملگه آشیریلیشینی ایتکن.
صدیقینینگ ایتیشیچه، علومینینگ سوزلری قندوز واقعهسیدن آلدین طالبلرگه قرشی حربی عملیات یولگه قوییلیشی خصوصیده، جمهور رییس غنینینگ قرشیلیگینی کورستهدی.
پارلمان اعضالریدن باشقه بیری عبدالقادر زازینینگ ایتیشیچه، ملی خوفسیزلیک باشلیغی مجلس ییغینده، قندوز اوستیگه طالبلرنینگ هجومی توغریسیدهگی معلوماتنی واقعهدن آلدین؛ جمهور رییس، اجراییه باشلیغی، ملی امنیت کینگشی و مملکت مدافعه وزیرلیگی بیلن شریک قیلگنینی ایتکن.
شونینگدیک پارلمان اعضالریدن بیرقطاری، امنیتی رسمیلر جوابینی قانیقرلی بیلمهی و کیلهسی آیلرده اولرنینگ استیضاح بولیشلرینی سورهگن.
قندوز خلقینینگ پارلماندهگی نمایندهسی شکریه پیکان، مذکور ولایت امنیتی وضعیتی توغریسیده خواطر بیلدیریب ایتیشیچه، قندوز یشاوچیلری ییمک ماده و اجتماعی خذمتلرگه قول تاپهآلمهیدی.
خانم پیکانگه کوره، امنیتی رسمیلرنینگ سوزلری حکومت تامانیدن قندوز قوتقریلیشی خصوصیده جدی لایحه یوقلیگینی کورستهدی. خانم پیکان، بو سوزلرنی یالغان دیب ایتیشیچه، بوتون خلق حاضر قوراللی طالبلر قمراویده قالگن.
شونینگدیک (چهارشنبه کون) مجلس ییغینیده، قندوز شهری اوستیگه اویوشتیریلگن هجوم توغریسیده ایلگریدن امنیتی رسمیلر خبردار بولگنده هم بو واقعه یوزبیرگنی خصوصیده امنیتی رسمیلردن سورهلدی، بیراق بو سوراقلر امنیتی رسمیلر تامانیدن جواب سیز قالدی.
