نورستان ولایتینینگ محلی رسمیلرینینگ ایتیشیچه، ولایت کامدیش ولسواللیگینینگ اهالیسی قوراللی طالبلر تامانیدن قورشاووگه آلینگن.
اوز نامی فاش ایتیلیشینی ایستمهگن نورستان ولایتینینگ امنیتی بلند مرتبهلی رسمیلریدن بیرینینگ سوزلریگه قرهگنده، اوتگن کون (جمعه) مذکور ولایتنینگ کامدیش ولسواللیگیگه طالبلر نینگ قیلگن هجومیده پولیس نینگ توقیز حربی عسکری هلاک بولیب و باشقه اوچ نفر ایسهتن جراحتی آلگن.
اونینگ سوزلریگه کوره، قوراللی طالبلر اوتگن کون اوشبو ولسواللیکنینگ خوفسیزیلیک پوستهلریگه هجوم قیلگنلر. ایتیلیشیچه ملی کوچلر و جنگری طالبلر اورتهسیدهگی اوروش کیچهنینگ بی وقتیگچه دوام تارتگن. اما، اوروش حاضر یکونلنگنی ایتیلهدی.
اونینگ سوزلریگه قرهگنده، توقنشووده عصیانچی طالبلرنینگ 9 اعضای هلاک بولیب و 14 اعضاسی ایسه یرهلنگن.
اما، قوراللی طالبلرنینگ سوزلاووچیسی ذبیحالله مجاهد، اوروشده ملی کوچلرنینگ 9 حربیسی اولدیریلیب و 13 عسکری تن جراحتی آلگن لیگینی ادعا ایتگن.
شونینگدیک طالبلر مذکور هجوم نتیجهسیده ملی کوچلریگه تیگیشلی بیر قنچه قورال اسحله قولگه کیریتگنلیکلرینی ادعا قیلگنلر.
نورستان ولایت کینگشی نینگ رییسی مهندس سعادالله پایندهنینگ بیلدیریشچه، بیش ییلدن بیری ولسواللیک نینگ برچه ملازملری کامدیش قیشلاغی نامی آستیده ایش قیله دیلر، ولسواللیکنینگ باشقه کوپچیلیک منطقهلری جنگری طالبلر اشغالیده.
شونینگدیک سعادالله نینگ آگاهلنتیریشیچه، مرکزی حکومت کامدیش ولسواللیگی اوچون جدی اعتبار قرتمهگن حالده، قوراللی طالبلر ولسواللیک خلقینی قتیق قیینچیلیکلرگه دورچار قیلگن.
بو توغریده تفصیلات بیریشمهگن نورستان ولایتی امنیتی رسمیلری، بوندن آلدینلری کامدیش ولسواللیگی بوتونلی جنگریلر تصرفیدن آزاد ایتیلیشی اوچون نیچه مرته حربی تازهلش عملیات اوتکزیلگن لیگینی ایتگنلر. اما، ولایت کینگشینینگ رییسی هنوزگچه هم بو ولسواللیک طالبلردن تازهلهنیشی اوچون هیچ قندهی عملیات اوتکزیلمهگن دیگن.
نورستان ولایتی نینگ امنیه قوماندانی بوندن نیچه وقت آلدین ولسواللیکده افغانستانلیک طالبلردن تشقری خارجی جنگریلرهم بارلیگینی تیلگه آلگن ایدی.
نورستان ولایتینینگ شرقیده جایلشگن کامدیش پاکستان بیلن قوشمه چیگرهگه ایگه اوشبو ولسواللیک طالبلر آرقهلی هجوم آستیگه آلینشی اهالینی جدی معمالر بیلن روپه ره قیلیب تورهدی.
