حکومتنینگ ایشانچلی بیر منبعسی اوتگن کون قطار اوزباشیمچه کیشیلر شهید هفتهسینی سوء استعمال قیلیب تینچ اهالی و امنیتی کوچلرگه قرهته اوق اوزگنلیکلرینی معلوم قیلگن.
مذکور منبعنینگ سلام وطندارگه معلوم قیلیشیچه، اوشبو اوق اوزیشلر عاقبتیده ملی خوفسیزلیک ادارهسینینگ بیر عسکری، بیر گودک و 22یاشلی بیر یاش ییگیت قربان بولگن و ملی امنیت ادارهسینینگ بیر حربیسی قوشیمچه ابن سینا شفاخانهسینینگ بیر شفاکاری تن جراحتی آلگن.
شونینگدیک ملی خوفسیزلیک ادارهسی اوتگن کون (چهارشنبه) بیر خبرنامه ترقهتیب، مذکور ادارهنینگ بیر منصبداری اوز باشیمچه شخصلر طرفیدن اوزیلگن اوق نتیجهسیده قربان بولگن لیگینی قید ایتگن. حادثه کابل نینگ هود خیل منطقهسیده روی بیرگنی ایتیلهدی.
باشقه تاماندن افغانستان ساغلیقنی سقلش وزیرلیگینینگ سوزلاووچیسی کبیر کاوسی حادثهنی تصدیقلب، اوشبو اوباشلر اوتگن کون ابن سینا شفاخانهسینینگ بیر داکترینی کلتکلب بورنی همده نیچه جاینی سیندیرگنلیکلرینی تیلگه آلگن.
اوتگن کون شهید هفتهسی مناسبتی بیلن خیابانلرگه چیققن اوشبو اوزباشیمچه کیشیلر حربی کییم همده قورال اسلحه بیلن جهازلنگنلیکلری ایتیلهدی. شونینگدیک اوشبو شخصلر از موترلریگه احمدشاه مسعود و مارشال فهیم نینگ فتو صورتلرینی یاپیشتیریب ینه ایریم بیرهقلرنی کوتاریب بازارلرگه چیققنلر.
عین حالده، شهیدلر هفتهسی کونینی نشانلش اوچون پایتخت کابلده اهالی امنیتینی تامین قیلیش اوچون مخصوص کمیسیون تشکیل ایتیلگن ایدی.
احمدشاه مسعود بنیادی اعضاسی نظری پریانی و شو مناسبت اوچون ایجاد ایتیلگن کمیسیون اوزباشیمچه کیشیلر حقیده ایتیشیچه، قورال اسلحه کوتارگن ینه اهالینی اذیت قیلگن شخصلر هیچ بیر زمان مذکور بنیاد دن نمایندهلیک قیلمیدی.
پریانیگه کوره، خیابانلرگه چیقیب اهالینی آزار و اذیت بیرمهگن کیشیلرهم اوشبو بنیاد بیلن هیچ قندهی علاقهسی یوق.
شونینگدیک او، اوباشلر آلدینی آلیش خوفسیزلیک ادارهلرینینگ وظیفهسی دیگن.
پریانینینگ سوزلریگه قرهگنده، هر ییل شهید هفتهسی نشانلهنیش کونلری معین شخصلر قطار شخصلرگه قورال اسلحه ترقهتیب، اهالینی احمدشاه مسعودگه نسبتن نفرتینی اویغاتهدی.
پریانیگه کوره، احمدشاه مسعود ایناغهسی همده مسعود بنیادینینگ رییسی احمد ولی مسعود و احمدشاه مسعود اوغلی احمدمسعود مذکور بنیادنینگ برچه اعضالریدن اهالیگه آزار و اذیت ییتکزمسلیکلرینی سورهگنلر.
عینحالده، سیاسی تحلیلچی عصمت قانع، شهید هفتهسینی نشانلش کونی قوراللنیب بازارلرگه چیققن کیشیلر دولتی موترلرگه باردی کیلدی قیلگنلیکلرینی ایتگنلر.
قانعگه کوره، مذکور شخصلر احمدشاه مسعود بنیادیدن نمایندهلیک قیلمهگن حالده، اوشبو بنیاد مسووللری همده دولت کوچلری اولرنی آلدینی آلیشی کیرهک ایدی.
اونینگ کوپیتیریشیچه، بوندهی مخصوص کونلرده اهالینینگ آزار و اذیتیگه سبب بولهدیگن شخصلر جهادی قوماندانلرگه تیگیشلی بولیب، انه شوندهی کیشیلر تامانیدن حمایت ایتیله دیلر.
سنبله آیینینگ 18دن 24 گچه افغانستان رسمی تقویمیده شهید هفتهسی یازیب قید ایتیلگن و هر ییلی اوشبو هفته نینگ 18سنبله رسمی ییغین آرقهلی نشانلنهدی.
اوتگن کون هم انه شو مناسبت بیلن کابل نینگ پلی تخنیک بیلیم یورتیده جایلشگن لویه جرگه خیمه سیده اوتکزیلگن اولکن ییغینده دولت بلند مرتبهلی رسمیلری قوشیمچه جهاد رهبرلری اشتراک قیلگن ایدیلر.
