قندوز ولایتی‌نینگ پولیسی بیر تعویذیازووچی نینگ بوتون عایله‌سینی اولدیریش‌گه قصد قیلگن بیر کیشی‌نی قول‌گه آلگن.
قندوز امنیه قوماندان‌لیگی‌نینگ سوزلاووچی‌سی سید سرور حسینی نینگ سلام وطندارگه ایتیشیچه، خاتین قیزلرنی اخلاقی بوزوقلیککه چقیرگن مذکور تعویذ یازووچی‌نینگ عایله‌سینی اولدیریش نیتده بولگن کیشی بوگون ایرتلب قندوز شهری تورتینچی حوزه‌سی‌نینگ پولیسی آرقه‌لی قول‌گه آلینگن.
قوماندان‌لیک‌نینگ سوزلاووچی‌سی، دین‌محمد ناملی شخص خان آباد ولسوال‌لیگی آقتاش منطقه‌سی‌نینگ یشاووچی‌سی بولگن لیگنی ایتگن.
جناب حسینی، دین محمد سونگی کونلرده عایله‌سی‌نینگ اعضاسی اوشبو تعویذیازووچی شخص تامانیدن اخلاقی فساد و فحشاگه دعوت ایتیلگن‌لیگینی سیزگن بیر چاغده بونده‌ی بیر عمل‌گه اورگن‌لیگینی ایتگن.
شونینگ‌دیک جناب حسینی، دین‌محمد دستلب زهرلنگن گوشت بیلن اوشبو تعویذیازووچی خانه‌دانی‌نی زهرلنتیریب سونگ اولرنی اولدیریش‌گه نیت قیلگن دیگن.
حسینی، حادثه یوز بیرمس‌دن آلدین دین محمد قوشیمچه تعویذیازووچی‌نینگ برچه خانه‌دانی پولیس تامانیدن قول‌گه آلینیب عدلی وقضایی اداره‌لرگه تاپشیریلگن دیگن.
افغانستان‌ده تعویذ دن کینگ کولم‌ده فایده‌لنیله‌دی. کوپینچه عیال‌لر موجود مشکل‌لری برطرف ایتیلیشی اوچون تعویذ یازووچیلرگه مراجعه قیله‌دیلر. شونینگ‌دیک کوپینچه وقت‌لرده قطار عیال‌لر تعویذیازووچی لر آرقه‌لی سوء استعمال بولگن‌لیکلری ایتیله‌دی.
اوتگن ییل حوت آیی‌نینگ آخریده کابل شهریده بیر قطار غضب‌لنگن کیشی‌لر 27 یاشر فرخنده‌نی قرآن شریف‌نی اوتگه یاندیرگن‌لیک عیبی بیلن کلتکلب اولدیرگن ایدی‌لر.
اما، افغانستان دولتی‌نینگ آلیب بارگن تیکشیروولریدن سونگ فرخنده قرآن شریف‌نی اوتگه یاندیرمه‌گن لیگی اثباتلندی. شونینگ‌دیک مذکور زیارت اتاق‌لری مسووللر تامانیدن تیکشیریلگن‌دن سونگ، اوشبو اتاقلر بیریدن «کانودم» همده جنسی قابلیتنی آشیرووچی دارولر قول‌گه کیریتیلگن ایدی.
