افغانستان ملی امنیت ریاستی بیر خبرنامه ترقه‌تیب ننگرهار ولایتیده داعش گروهی رهبرلیک هیأتی ییریک اعضالریدن بیری شاهدالله شاهدنینگ اولگنیدن خبر بیردی.
خبرنامه‌گه کوره، نیچه‌پیت آلدین ننگرهار ولایتیده بو گروه‌گه قرشی عمل‌گه آشیریلگن هوایی هجوم نتیجه‌سیده افغانستانده‌گی داعش گروهی‌نینگ ایکینچی آدمی گل‌زمان و اوشبو گروه‌نینگ جنگری اورین باسری جهادیار هلاک بولگن ایکنلر.
بیراق، حاضر بو ریاست‌نینگ ایتیشیچه، قولگه کیریتگن معلومات‌لری‌گه اساسن، مذکور هجوم‌ده شاهدالله شاهد‌هم هلاک بولگن ایکن.
داعش گروهی‌نینگ اوشبو آدم‌لری ننگرهار ولایتی اچین تومنی‌ده هلاک بولگنلر.
شاهدالله شاهد دیب تانیلگن شیخ مقبول، بوندن آلدین پاکستان‌لیک طالب‌لر سوزلاوچیسی ایدی و بو گروه‌دن اجره‌لگنیدن کیین داعش‌گه قوشیلگن.
ایتیلیشیچه، داعش‌نینگ اوشبو ییریک عضوی افغانستان و منطقه‌ده کته اوروش یولگه قوییش‌گه قصد قیلگن ایکن و بو ایشی بیلن اوزی‌نینگ تانیقلی آدم‌گه اوزگرتیریشینی ایسته‌گن.
شونینگ‌دیک ملی امنیت ریاستی تامانیدن نشر ایتیلگن ویدیوگه، داعش گروهی‌دن « اسلام قانونی‌گه ننگلی داغ» دیب ایسلنگن. مذکور ترماغ‌گه کورسه‌تیلیشیچه، «افغانستان داعش اورنی ایمس دیر».
بو ترماغ ملی امنیت ریاستی رسمی فیسبوک صحیفه‌سیده نشر ایتیلگن، داعش گروهی‌نینگ عراق و سوریه چیگره‌لریده قیلگن فعالیت‌لرینی کورسته‌دی. اوندن کیین ملی امنیت، خاص کوچلری‌نینگ داعش‌گه قرشی کوره‌شیش فعالیت‌لری کورگزمه‌ده قوییلگن.
شونده‌ی بیرحالده، مملکت ایریم ولایت‌لریده طالب‌لرنینگ هجومی کوپه‌ییشی‌گه قوشیمچه، افغانستان‌ده داعش گروهی‌نینگ فعالیت‌لری کوپیگنی توغری‌سیده خواطرلر موجود.
اجراییه ریاستی اورین باسری نیچه پیت آلدین، افغانستان‌ده داعش گروهی حضوری واقعیت دیگن ایدی. شونده‌ی بیرحالده، امنیت رسمی‌لری‌نینگ ایتیشیچه، امنیتی کوچلر، بو گروه‌گه قرشی کوره‌شیش‌گه قادر دیر و اولرنی هر ییرده بولسه نابود ایته‌دی.
گزارشلرگه کوره، داعش ننگرهار ولایتی ایریم منطقه‌سیده ایرکین صورتده فعالیت قیله‌دی و حاضر بومنطقه‌ده عسکر آلماقده‌لر.
