هرات امنیتی رسمی‌لری‌نینگ ایتیشیچه، مذکور ولایت ایریم تومنلریده طالب‌لرنینگ نیچه گروهی هجومی آلدی آلیندی.
هرات امنیه قومندانی عبدالمجید روزی‌نینگ شنبه کونگی خبری اولتیریش‌ده چیقیش قیلیب ایتیشیچه، طالب‌لر مذکور ولایت شیندند، گلران، اوبه و فارسی تومنلریده گروهی هجوم اویوشتیریش‌گه قصد قیلگن ایکن، بیراق امنیتی کوچلر مذکور هجوم‌لرگه قرشی توسیق بولگنلر.
جناب روزی‌گه کوره، سونگی هفته‌ده شیندند تومنی‌گه اویوشتیریلگن هجوم نتیجهسیده 10طالب هلاک بولیب و باشقه 20 ته‌سی تن جراحت آلگن. هرات امنیه قومندانی‌نینگ کوپه‌یتیریشیچه، طالب‌لر تامانیدن شیندند تومنی‌ده ایکی کونلیک اویوشتیریلگن هجوم‌لر آلدی آلینگن.
شیندند تومنی‌ده امنیتی تهدیدلر کوپیگنی‌دن سونگ، طالب‌لرگه قرشی کوره‌شیش اوچون مذکور تومن‌ده امنیتی کوچلر سانی آشگن.
سونگی هفته‌لرده طالب‌لر هجومی فراه، غور و بادغیس ولایت‌لریده کوپیگن.
باشقه تاماندن، هرات امنیه قومندانی‌نینگ ایتیشیچه، طالب‌لر سونگی کونلرده هرات‌ده تفریحی منطقه‌لرنی ناتینچ قیلیش اوچون کوره‌شه‌دیلر.
اونگه کوره، ینگی‌لیک‌ده عصیانچی‌لر تفریحی منطقه‌لرده مذکور ولایت اهالیسی‌نی اوغیرلشگه باشله‌گن.
جناب روزی‌نینگ کوپه‌یتیریشیچه، اوتکن جمعه کونی قوراللی شخص‌لر بیر سوداگرنی تفریح‌گاه‌دن قیته دیگن بیر چاغ‌ده اوغیرله‌گن ایدیلر، مذکور شخص امنیتی کوچلر واسطه‌سی بیلن شنبه کون ایرته‌لب قوتقریلدی.
هرات ولایت امنیه قومندانی‌نینگ ایتیشیچه، طالب‌لر هرات‌نی ناتینچ قیلیش اوچون کوره‌شه‌دی، اما امنیتی کوچلر اولرگه قرشی توخته‌یدیلر.
هرات امنیتی مسؤول‌لری‌نینگ ایتیشیچه، ولایت‌ده‌گی طالب‌لرنینگ امنیتی کوچلر بیلن یوزمه یوز کوره‌شیش‌گه کوچی ایتمه‌یدی، مذکور گروه فعالیتی جوزا آیی‌نینگ اداغی‌گه قدر دوام ایته‌دی.
رسمی‌لرگه کوره، حاضرگی کونلرده طالب‌لرتینچ اهالی فکری‌نی مخشوش قیلیش اوچون کوره‌شماقده‌لر.
شونینگ‌دیک هرات امنیه قومندانی، شیندند و فراه ولایتی‌ده داعش گروهی‌گه باغلیق کیشی‌لر موجود لیگی‌نی تأیید قیله‌دی.
