12- حمل بامیان ولایتینینگ یوزلب یشاووچیسی نمایش اوتکزیب، کابل – قندهار یولیده اوغیرلنگن 31 یولاووچی آزاد ایتیلیشینی سورهگنلر. گروگان آلگنلرنی دشمن دیب اتهگن نمایشچیلر، حکومت اوغیرلنگنلر تیزده آزاد ایتیلیشی اوچون کوپراق سعی و حرکت قیلیشینی طلب قیلگنلر.
بامیان یشاووچیلری «گناه سیز یولاووچیلرنی آزاد قیلینگ، قچانگچه سفر اسارت و خطر» دییه شعار بیرگنلر. نمایشچیلر بامیان بازار خیابانلرینی اریکن چوکیگچه یوریب کیلگنلر.
نمایشده قتنشگنلردن عمران راطب، حکومتدن هیچ قندهی تبعیض نظرده توتیلمسدن گروگان آلینگنلر قوییب یوباریلیشینی سورهگن. او، حکومت نمایشچیلرنینگ ایستهگیگه جواب بیرمهگن حالده، اعتراضلرینی کینگیتیریشدن آگاهلنتیرگن.
مذکور اعتراضده اشتراک قیلگن بامان ولایت کینگشینینگ رییسی طیبه خاوری اوغیرلنگنلر آزاد ایتیلیشی اوچون حکومت کوپراق سعی و حرکت قیلیشی بارهسیده تاکیدلهگن.
نمایش سونگیده 6 مادهلیک قطعنامه صادر ایتیلگن.
قطعنامهده، نمایشچیلر حکومتدن گروگان آلینگنلر تیزلیکده آزاد ایتیلیشی اوچون هیچ قندهی سعی و حرکتنی اَیهمسلیگی خصوصیده تاکیدلنگن.
شونینگدیک اعتراض بیلدیرگنلر افغانستاندهگی خلق ارا ادارهلر اینیقسه بیرلشگن ملتلر تشکیلاتینینگ نمایندهلیگی (یوناما)دن مساله اوچون جدی اعتبار قرهتیشینی طلب قیلگنلر.
عین حالده، نمایشچیلر بوندهی دَسیسهلر هیچ بیر زمان افغانستان خلقی ایچیده موجود ملی بیرلیککه زیان ییتکیزه آلمیدی دیگنلر.
بوندن چمهسی قیرق کون اول کابل – قندهار عمومی ترانسپورت یولیده 31 یولاووچی هزاره نا معلوم شخص لر طرفیدن اوغیرلنگن ایدی؛ اما هنوزگچه اوتکزیلگن حربی عملیاتلر و ینه قوم یاش اولوغلرینی واسطهچیلیگی اوشبو گروگان آلینگنلر آزاد ایتیلیشی اوچون نتیجه آلیب کیلگنیچه یوق.
