افغانستان سیلاولر مستقل کمیسیونی نینگ رییسی یوسف نورستانی، کمیسیونگه قانونگه ضد هر قندهی اوزگریش کیریتیلیشی تن آلمسلیگی بارهسیده تاکیدلهگن.
او بوندهی سوزلرنی، سیلاولر مستقل کمیسیونیگه اوزگریش کیرتیلیشی اوچون کمیسیون ایجاد ایتیلیشی بارهسیده ترقه تیلگن خبرلردن سونگ تیلگه آلگن.
نورستانی، هیچ کیمگه شخصی ایستکلرینی بهانه توتیب بو کمیسیونگه اصلاحات کیرتیشگه رخصت بیرمسلیگی خصوصیده تاکیدلهگن.
سیلاولر مستقل کمیسیون رییسی بو مسالهگه افغانستان ملی بیرلیک حکومتی تشکیل ایتیلیشی اوچون بیرینچی شرطلردن مذکور کیمسیونگه اصلاحات کیرتیلیشی بولگن بیر چاغده جدی عکسالعمل کورستماقده. شونینگدیک جمهور رییس غنی حوت آیی نینگ 16 – سیده ملی مجلسنی آچیش ییغینیده قیلگن چیقشیده کمیسیونگه اصلاحات کیرتیش اوچون تیزلیکده مخصوص کمیسیون تشکیل ایتیلیشینی ایتگن ایدی.
جناب نورستانیگه کوره، کمیسیون تشکیلات و توزیلیشیگه اصلاحات و اوزگریش کیریتیلیشی اوچون اوزی تورت آی آلدین حکومتگه ایریم تکلیفلرنی قیلیب، هنوز هم بو باره ده حکومت قرارینی کوتهدی.
سیلاولر مستقل کمیسیونیگه اصلاحات کیرتیش موضوعی سیلاولرنی کوزه تیب باره دیگن ادارهلر، مدنی جماعهچیلیک تشکیلاتلری و نمایندهلر مجلس اعضالری بو کمیسیونگه اصلاحات کیریتیلیشینی تاکیدلهگن بیر حالده، عکس العمللر آشماقده.
بوندن آلدین اروپا اتفاقی هم افغانستان سیلاولر کمیسیونیگه اصلاحات کیریتیلمهگن تقیرده، اوتکزیلهجک پارلمانی سیلاولرگه هیچ قندهی مالی همکارلیک قیلمسلیکلری بارهسیده آگاهلنتیرگن ایدی.
افغانستان اساسی قانونیگه موافق پارلمانی سیلاولر 1394- ییل ثور آییده اوتکزیلیشی قید ایتیلگن، هنوز گچه هم مملکتده پارلمانی سیلاولر اوتکزیلیشیدن قندهی دیر خبر یوق.
