د بادغیس ولایت د ولایتي شورا یو شمېر وکیلان د دې خبر په تایید سره وايي، چې تېره ورځ ناوخته مهال د دې ولایت د جوند ولسوالۍ د الله یار سیمې په «پای چنګ، آب خزه او مینه بام» کلیو کې یو سیمهییز قوماندان د یو پخواني سناتور د کور په ګدون ۸۵ کورونه سوځولي دي.
د بادغیس د ولایتي شورا یو وکیل خانجان ظفر سلاموطندار ته وویل، چې د ملاګل محمد په نامه یو سیمهییز قوماندان د دې ولایت د یو پخواني سناتور محمد الله یار د کور په شمول دغو شمېر کورونو ته اور اچولی دی.
ښاغلی ظفر د دې غیرمسوول قوماندان لهخوا د کورونو سوځولو پېښه، د سناتور او د قوماندان ترمنځ خپلمنځي اختلافات بولي.
د ولایتي شورا د غړي پر وینا، اوسمهال د بادغیس د جوند ولسوالۍ هغه اوسېدونکي چې کورونه یې سوځول شوي؛ د ولسوالۍ د مرکز شاوخوا کلیو ته کوچېدلي دي.
د بادغیس د والي ویاند ظاهر بهاند د دې پېښې په اړه ناخبري ښيي.
د «الله یار» سیمه د جوند ولسوالۍ سره په ۴۰ کیلومترۍ کې پرته ده، چې د غور ولایت سره شریکه پوله لري او ډېرې برخې یې د وسلهوالو طالبانو په لاس کې دي.
