د ناقانونه پیسو لومړنۍ محکمه د اداري فساد د سنګینو جرمونو په وړاندې د مبارزې عدلي او قضایي مرکز له لورې په کابل کې ترسره شوه.
په دې محکمه کې محمد معصوم د رازمحمد زوی د ۲۶۱۲۰۰ امریکايي ډالرو، ،۳۲۳ زره افغانیو، ۲۹۹۵۰ پاکستانی کلدارو او ۳۱۷،۳۰۰ ګرامه طلا په تطهیر محکمه شو.
د فساد په وړاندې د سنګینو جرمونو د عدلي او قضایي مرکز د لومړنۍ محکمې رییس شیر اقا منیب اسنادو او ثبوتونو ته په کتو سره محمد معصوم په درېیو کلونو بند او ۱۰۰ زره افغانیو نقدي جریمې محکوم کړ.
د منیب پر وینا دغه اخري پرېکړه نه ده او تورن کس د استیناف محکمې حق هم لري.
په ناقانونه پیسو تورن محمد معصوم چې د نیول کېدو په وخت کې د ارزګان د پولیسو قوماندانۍ د تدارکاتو ځای ناستې و.
دی وایي، چې دا پیسې یې خپل حق دی او که چېرته محکمې د ده جرم ثابت کړ؛ نو دې د هر ډول سزا منلو ته تیار دی.
محمد معصوم وویل، رشوت یې نه دي اخیستي او د عدلي قضايي ادارې له مشرتابه یې د مرستې غوښتنه وکړه.
دا د ناقانونه پیسو په اړه لومړنۍ نظامي محکمه ده، چې له اداري فساد او درنو جرمونو سره د مبارزې عدلي او قضايي مرکز له خوا ترسره شوه، دغه مرکز څه موده مخکې هم په یوې بلې محکمې کې د ځمکې دوه تنه غاصبان په علني توګه محاکمه کړل.
