د روسيې یوې معتبرې ورځپاڼې " ایزویستیا" لیکلي، چې افغانستان په داسې یو بحراني شرایطو کې یوازې د حامد کرزي په شان شخص ته ضرورت لري.
ورځپاڼې زیاته کړې، د افغانستان پخوانی ولسمشر حامد کرزی کولی شي، چې افغانستان وژغوري او روسي چارواکي د هغه ملاتړ کوي.
سیاسي شنونکي اکبرجان فولاد سلام وطندار ته وویل، چې د افغانستان په کورنیو چارو کې لاس وهنه د اساسي قانون سره په ټکر کې دی او هر هیواد، چې داسې یو کار کوي، هغه د افغانستان دښمن دی.
فولاد زیاتوي، د سیمې هیوادونه تل هڅه کوي، چې د افغانانو ملي ګټې په خطر کې واچوي او پر وینا يې د روسیې دا ډول څرګندونې د دوی د دوه مخي سیاست څرګندونه کوي.
په همدې حال کې، سیاسي شنونکی لطیف نظري وایي، یو لوی پلان په سیمه کې د پلي کیدو په حال کی دی، چې موخه یې د ناټو له سیاست والو او په سیمه کې یې د متحدینو سره مقابله ده.
د نظري پر وینا، روسیه په سیمه کې د داعش ډلې فعالیت د غرب دسیسه بولي او ترڅنګ یې کرزی په سیمه کې د غرب مخالف کس بولي او په دې باور ده چې د هغه په ملاتړ سره به، وکولی شي چې د داعش ډله پرې نه ږدي، چې منځنۍ اسیا ته لاره پېدا کړي.
نظري زیاتوي، روسیه په دې باور دی، چې د غرب او افغانستان په یووالي کې د روسيې ملي ګټې له خطر سره مخ کېدای شي.
شنونکي ټینګار کوي، چې د روسيې د چارواکو خبرې د هیواد په اوسني حالت کې د دې ښکارندویي کوي، چې روسیه غواړي په سیمه کې خپل ځواک زیات او تر ډیره په هغو هیوادونو کې خپل نفوذ ډیر کړي، چې له امریکا سره متحد دي.
