.jpg)
افغان کرکټ ملي لوبډلې د اروپا سفر له پاره په هندوستان کې د وېزو اخیستلو ترڅنګ خپل رسمي تمریناتي کمپ هم پیل کړ.
د افغانستان کرکټ بورډ لخوا په خپره شوې خبرپاڼه کې راغلي، چې پیل شوی روزنیز کمپ به د دوو اونیو له پاره د هندوستان په (ګرېتر نویدا) کرکټ لوبغالي کې روان وي.
افغان کرکټ بورډ د کرکټ د اصولو خلاف هندوستان ته د لېږل شوې ۲۶ کسیزې لوبډلې نوملړ رسنیو ته نه دې سپارلی.
د کرکټ بورډ خبرپاڼه زیاتوي چې، په دې روزنیز کمپ کې د افغانستان د کرکټ ملي لوبډلې ۲ پخواني لوبغاړي رییس احمدزی او دولت احمدزی د روزنې چارې په غاړه لري.
کرکټ بورډ زیاتوي، چې د هندوستان تمریناتي کمپ موخه یې راتلونکې میاشت د سکاټلیند او ایرلینډ خلاف یو ورځنیو او د هالینډ خلاف ۴ ورځنیو مهمو "انټرکانټینینټل جام" سیالۍ ته چمتووالی دی.
.jpg)
د کرکټ بورډ خبرپاڼه لیکي، چې د اروپا سفر له پاره د هر اړخیزو تیاریو په موخه ملي لوبډلې ته په هندوستان کې اسانتیاوې برابرې کړي دي.
افغان کرکټ بورډ په داسې حال کې په ډېر کم وخت کې د اروپا سفر له پاره په هندوستان کې تیاری پیل کړی، چې د دواړو هېوادونو اوسنۍ هوا توپیر لري، چې په اروپا کې اوسمهال یخني او په هندوستان کې د سختې ګرمۍ زور دی.
ټاکل شوې ده، افغان کرکټ ملي لوبډله د روانې (جون) میاشتې په وروستیو کې اروپا ته سفر وکړي، چې لومړې به د (جولای) په ۴ مه نېټه له سکاټلینډ سره لوبه وکړي، ورپسې به ایرلینډ ته سفر وکړي او بیا به دغه اوږد سفر هالینډ سره په څلور ورځنۍ سیالۍ پاې ته ورسوي.
تر اوسه پورې د کرکټ بورډ لوړ پوړو چارواکو د سفر په اړه کره اسناد نه شته خو داسې ویل کېږ، چې د کرکټ بورډ چارواکو یو ځل بیا د پخوا په څېر د اروپا سفر له پاره د سفر تیاری نیولی دی.
