د برېښنا شرکت چارواکي وايي، چې د زورواکو او هغو بنسټونو د برېښنا مزو په غوڅولو سره چې د مصرف شوې برېښنا پيسې نه ورکولې تر اوسه یې له دغو کسانو نه شاوخوا ۳۰ میلیونه افغانۍ اخیستي دي.
د دغه شرکت مسولین وايي، تېره اونۍ د رسنیو په موجودیت کې او د پولیسو په مرسته د برېښنا پوروړو د کورونو د مزو غوڅول پیل کړل.
د برېښنا شرکت سوداګریز مرستیال صفي الله احمدزي وویل، دغه کار مثبته پایله لرله او د برېښنا مزو په غوڅولو سره یې د هغو کسانو نه چې له څو کلونو راهیسې د برېښنا پوروړي وو؛ پورونه واخیستل.
داسې انګېرنه موجوده وه، چې دغه زورواکي به د برېښنا مزو له غوڅولو او پورونو له ورکولو پرته د برېښنا مزي په خپل سر وتړي.
خو د برېښنا شرکت د چارواکو پر خبره، د رسنیز پوښښ او حکومت په مرسته دغو کسانو له زوره استفاده ونه کړه.
احمدزي وویل د برېښنا یو شمېر پوروړو ژمنه کړې ده، چې ډېر ژر به خپل پورونه ادا کړي.
ده وویل، هغه کسان، چې د برېښنا پيسې نه ورکوي عدلي او قضايي ارګانونو ته به ور وپېژندل شي او زیاته کړه، چې د برېښنا پوروړو کسانو او بنسټونو شمېر ۲۵ رزو ته رسیږي.
د برېښنا شرکت چارواکي وايي، چې ډېر پوروړي یې زورواکي او د پخواني او اوسني حکومت چارواکي دي.
د دوي پر خبره، د ننګرهار پخواني والي ګل اغا شیرزوی، د اطلاعاتو او کلتور پخوانی وزیر سید مخدم رهین، د مشرانو جرګې رییس فضل هادي مسلمیار او د ولسي جرګې غړی لالی حمیدزی هغه کسان دي، چې د برېښنا بېل پیسې یې نه دي پرې کړي.
