د ولسي جرګې په استجوابیه غونډه کې د عامې روغتيا وزیر فېروز الدين فېروز وویل، چې دی د هېروینو او تاریاکو پر بدیل کار کوي.
دی وايي، چې د تارياکو او هېروينو پر ځای به د " متادون"په نوم تابلیت روږدو کسانو ته ورکړي.
هغه وايي، چې متادون د هېروينو او تارياکو پر ځای د نړۍ په زیاتو هېوادونو کې کارول کيږي، چې خورا زیاتې ګټې هم لري.
د ډاکټرانو په وينا، پر هېروينو روږدي کسان نه شي کولی، چې د پرېښودو له پاره يې لکه سګرټ ورځ تر بلې يې د څکلو اندازه کمه کړي.
هېروين داسې يو خاصيت لري، چې باید روږدي کسان يې په هماغه اندازه یعنی نه کم او نه زیات وڅکي.
خو د عامې روغتيا وزیر په خبره، په دغه متادین نومي تابلیت کې داسې وړتيا شته، چې استعمالونکي يې کولی شي د ورځ په تېرېدو سره مقدار کم کړي، خو پر روږدي شوي شخص اثر ونه کړي او د ورځ په تېرېدو سره به يې دا چاره د پرېښودو لامل شي.
د عامې روغتيا وزیر زیاتوي، چې دغه تابلیت د کوکنارو په پرتله ارزان دي او همدارنګه د هېروينو برعکس د اخته کسانو فزيکي فعالیت هم نه کموي.
د فېروز الدین په وينا، اوسمهال پر دغو تابليتونو د افغان دولت له لوري بندیز لګېدلی، خو دی به کوښښ وکړي، چې د دغه تابلیت پر استعمال او واردولو لګول شوی بندیز لرې کړي.
همدارنګه د ولسي جرګې نننۍ عمومي غونډې ته د کورنيو چارو وزارت د نشه يې توکو پر وړاندې د مبارزې مرستیال بازمحمد احمدي هم استجواب شوی و.
هغه وویل، چې د پخوا په پرتله د لازمو امکاناتو او هوايي ځواک نه شتون د دوی یو له جدي ستونزو بلل کيږي.
بازمحمد وايي، چې ۱۳۹۱ م لمریز کال کې د نشه يي توکو پر وړاندې د مبارزې له پاره دوی ۵ زره پولیس درلودل، چې اوس دغه شمېره شاوخوا نيمايي ته راټيټه شوې.
د کورنيو چارو وزارت د نشه يې توکو پر وړاندې د مبارزې مرستیال زیاته کړه، چې همدا اوس د دوی د ځانګړو قطعاتو ۸۰ سلنه پولیس په بغلان او کندوز ولایتونو کې په جګړو بوخت دي، چې په وينا يې په دغه حالت کې د نشه يي توکو پر وړاندې مبارزه کول ستونزمنه ده.
دا په داسې حال کې ده، چې د راپورونو پر بنسټ د نشه يي توکو پر وړاندې د مبارزې په قانون کې شاوخوا ۸۰ سلنه تغيرات راغلي، چې د وکيلانو په وینا د دغه قانون په پلي کولو سره به د نشه يي توکو د مخنيوي په اړه زیاتې ستونزې را کمې شي.
