طبیعی حادثهلرگه قرشی کورهش ایشلری بوییچه دولت وزیرلیگی رسمیلرینینگ ایتیشیچه، 19 ولایتده آغیر قار یاغیشلر و هوا ساووقلیگی نتیجهسیده 42 کیشی هلاک و باشقه 43 کیشی یرهلنگن.
اوشبو وزیرلیک تامانیدن بیریلگن رقم اساسیده، سونگی قار یاغیشلر جانی زیانلر یانیده، 92 اوینی بوتونلهی بوزگن و باشقه 30 اویگه زیان ییتکیزگن.
بدخشان ولایتینینگ مایمی و یاوان تومنلریده قار یاغیشلر و هوا ساووقلیگی نتیجهسیده 18 کیشی هلاک و باشقه 12 کیشی یرهلنگن.
بدخشان ولایتیده طبیعی حادثهلرگه قرشی کورهش اداره باشلیغی سید عبدالله همایون دهقاننینگ سلاموطندارگه ایتیشیچه، بدخشاننینگ مایمی تومنی بُرغد قیشلاغی و یاوان تومنیده قتیق قار یاغیشلر نتیجهسیده 10 کیشی هلاک بولگن و باشقه 12 کیشی یرهلنگن. یرهلنگنلردن بیرقطارینینگ احوالی آغیر گزارش بیریلگن.
جناب دهقاننینگ کوپهیتیریشیچه، بدخشانده 25 اولتیریش اوی بوزیلیشیگه قوشیمچه، 10 تومننی ولایت مرکزی بارهدیگن قتناو یوللری توسیلگن. بیرقطار قیشلاقلرده قارگه قمهلیب قالگنلرگه ییر آرقهلی یاردم ییتکزیب بولمهیدی.
بدخشان ولایتی طبیعی حادثهلرگه قرشی کورهش اداره باشلیغیگه کوره، اولر زیان کورگنلرگه یاردم ییتکزیش اوچون مرکزدن اوچاق طلب قیلگن.
باشقه بیر تاماندن، بامیان، دایکندی و غزنی ولایتلرینینگ محلی رسمیلریگه کوره، مذکور ولایتلرده قار یاغیشلر و قتیق بورانلر نتیجهسیده، تومنلرنی مرکزگه باغلهیدیگن برچه قتناو یوللر توسیلگن.
شونینگدیک، جوزجان محلی رسمیلرینینگ ایتیشیچه، اوشبو ولایتنینگ درزاب تومنی سردره و کولیان منطقهسیده 15 یولاوچی قارگه قمهلیب قالگن.
درزاب ولسوالی رحمتالله حشرنینگ ایتیشیچه، یوز قیشلاقنینگ تومن مرکزی و ولایت بارهدیگن قتناو یوللری یاپیلگن.
عین حالده، سرپل ولایتینینگ طبیعی حادثهلرگه قرشی کورهش اداره باشلیغی عزیزالله ایماننینگ سلاموطندارگه ایتیشیچه، اوشبو ولایتده قار یاغیشلر و هوا ساووقلیگی نتیجهسیده، 6 کیشی جان بیرگن.
جناب ایمانگه کوره، سرپل ولایتینینگ سانچارک تومنیده 24 اولتیریش اوی بوزیلگن و اوشبو تومننی مرکز و بلخاب بیلن باغلهیدیگن یوللر هم یاپیلگن.
باشقه بیر تاماندن، سالنگلرنی قوریب و سقلاوچی مسؤولی جنرال رجبنینگ ایتیشیچه، اوشبو قتناو یولده بوران و دواملی قار یاغیشلر دوام ایتماقده و بو یول تازهلنمسه یولاوچیلرنینگ یوزیگه آچیلمهیدی.
جناب رجبگه کوره، حاضرگچه سالنگ یولیده 18 مرته قار کوچگن و ینه هم کوچیشی ممکن.
شونینگدیک، تخار حاکمینینگ سوزلاوچیسی سنتالله تیمورنینگ ایتیشیچه، قتیق قار یاغیشلر باعث، چاه آب و رستاق تومنلرینی تخار مرکزی تالقان بیلن باغلهدیگن قتناو یوللر توسیلگن.
عین حالده، بوگون خبری بیر ییغینده سوزگه چیققن فواید عامه وزیرلیگی سوزلاوچیسی مهدی روحانینینگ ایتیشیچه، فواید عامه وزیرلیگی هوا مساعد بولگن صورتده، توسیلگن یوللرنی آچیش اوچون تیارگرلیک آلگن.
دیمک، حاضرگچه بدخشان، بامیان، دایکندی، غور، بلخ، سرپل، قندهار، کنر، ننگرهار، کاپیسا، غزنی، زابل، پنجشیر، پکتیا، پروان، بغلان، فاریاب، هرات، نورستان و لغمان ولایتلریده یوز بیرگن قار کوچکیلریدن گزارش بیریلگن.
