ننگرهار ولایتی‌نینگ داکترلری و ساغلیق‌نی سقلش ملازملری، ناراضیلیک بیر نمایش‌ده خوفسیزلیک تأمین‌لنیشی خصوصیده، حکومت‌نی کوچسیزلیک‌که عیب‌لگن‌لر. اعتراضچی‌لرنینگ ایتیشیچه، کونده قوراللی کیشی‌لر تامانیدن اولیم‌گه تهدید بوله‌دیلر و حکومت بو توغریده هیچ بیر ایش قیلمه‌گن.
اولرنینگ آگاه‌لنتیریشیچه، 10 کون‌گچه حکومت داکترلر و ساغلیق‌نی سقلش ملازملرنینگ خوفسیزلیگی‌نی تأمین قیلمه‌گن صورتده، بوتون ننگرهارده ساغلیق خذمت‌لری توخته‌تیله‌دی.
اعتراضچی داکترلردن بیری غلام‌سخی رحمانزی‌نینگ ایتیشیچه، اوتگن آلتی آیده 2 داکتر هلاک ایتیلگن، 5 ته‌سی یره‌لنگن، 7 ته‌سی اوغیرلنگن و باشقه 34 ته‌سی اولیم‌گه تهدید بولگن. رحمانزی‌نینگ کوپه‌یتیریشیچه، سونگی کونلرده قوراللی کیشی‌لر 7 داکتر دن پول ایسته‌گن.
ننگرهار حاکمی سوزلاوچیسی عطاالله خوگیانی‌نینگ ایتیشیچه، باشقه هر زماندن کوره ساغلیق‌نی سقلش ملازملری‌نینگ خوفسیزلیگی تأمین‌لنیشی خصوصیده سعی و حرکت قیله‌دیلر. جناب خوگیانی گه کوره، حاضرگچه اوشبو قضیه‌لر توغریسیده ملی خوفسیزلیک کوچلری اوچ کیشی‌نی قولگه آلگن.
بوندن آلدین هم مذکور ولایت‌نینگ ساغلیق‌نی سقلش ملازملری خوفسیزلیک‌لری تأمین‌لنیشی اوچون ایش تشله‌گن ایدیلر؛ لیکن خوفسیزلیک رسمی‌لری‌نینگ واسطه‌چیلیگی اساسیده موضوع حل ایتیلگن ایدی.
