د ښځو چارو وزارت د لومړي ځل له پاره د بغلان ولایت یوه اوسېدونکې مېرمن نفس جهید د کال "غوره مور" معرفي کړه.
نفس جهید ۵۶ کاله عمر لري.
د بغلان ولایت د ښځو چارو رییسه خدیجه یقین په خبري غونډه کې وویل، چې د کال د غوره مور د پېژندنې بهیر له درېیو لسیزو را په ديخوا په ټپه ولاړ او اوس یو ځل بیا پیل شو.
د یقین په خبره، د ښځو چارو وزارت مېرمن نفس جهید، د دې د "غوره کارنامو" او "ښوو خدمتونو" په پاره د کال غوره مور ونوموله.
مېرمن جهید بغلان ولایت د پوهنتون لومړنۍ بنسټ اېښودونکې او د دې ولایت د ښځو چارو ریاست لومړنۍ رییسه وه.
نوموړې د دې ولایت په ټولو ښوونځیو کې یو دوره د استاد په توګه کار کړی او یو ځل یې هم د دې ولایت د دارالمعلمین رییسه پاتې شوې ده.
دغه مېرمن په فارسي ژبه شعر هم لیکي او په ټولنیزو علومو کې لېسانس لري.
نفس جهید د افغانستان د ښځو د سراسري شورا د تشکیلاتو رییسه، د افغانستان د وړکتونو د عمومي ریاست رییسه او په شمال کې د مېرمنو د شورا سلاکارې په توګه هم دندې ترسره کړې دي.
