جاوېد افغان د هلمند له مرکز لښکرګاه نه پر خپل بایسکل د سولې پیغام رسولو په هیله سفر پیل کړ، خو مخکې له سفر پیلولو نه يې د خبرو پر مهال وویل، هیله لري چې په ایران، متحده عربي اماراتو ، سعودي عربستان او قطر کې د یادو هېوادونو له مشرانو او چارواکیو سره هم وګوري او ټولو ته د افغانانو یوازینۍ هیله چې دایمي سوله ده، ورسوي. نوموړی وايي، خپل سفر به په قطر کې د طالبانو له مرکچي پلاوي سره تر لیدنې وروسته پای ته ورسوي.
دی وايي، تر قطر پورې به يې سفر شاوخوا یوه میاشت وخت ونیسي او پر ټوله لاره به د افغانانو د سخت ژوند کیسې او د سولې اړوند پیغامونه خلکو ته ورسوي. نوموړی زیاتوي، د نورو هېوادونو د عادي وګړو تر څنګ به هڅه وکړي چي له مسوولانو سره هم وویني او د افغانانو د سخت ژوند کیسې ورته وکړي.
جاوېد افغان زیاتوي، پر خپلو جامو یې په پښتو ، فارسي ، انګلیسي او عربې ژبو لیکلي: «افغانان له جګړې ستړي دي، سوله غواړي.»
د جاوېد افغان په خبره، ځینې داسې تصویرونه چې د افغانانو د سخت ژوند او کړاوونو ښکاره ثبوتونه پهکې دي، هم له ځان سره وړي او په قطر کې د طالبانو مرکچي پلاوي ته به یې ور وښيي، څو هغوی د افغانانو له حاله خبر شي.
افغان دغه اوږد سفر ته ځکه اوږه ورکړې چې د سولې پیغام ورسوي، خو پوښتنه دا ده چې په قطر کې به د طالبانو مشران له ده سره وویني او کهنه؟ جاوېد افغان له هغوی سره لیدنې ته هیلهمن دی او وايي، ښايي ورسره وګوري.
هېره دي نه وي چې د سولې پیغام رسولو په موخه یوه ډله هلمندي ځوانانو شاوخوا یو کال مخکې له دغه ولایت نه تر مرکز کابل پورې پلی تګ وکړ. هلته يې د یو شمېر هېوادونو سفارتونو ته د سولې پیغامونه ورسول او وروسته یې بیا د هېواد شمالي ولایتونو ته هم په لوڅو پښو ځانونه ورسول او په هره سیمه، ولسوالي او ولایت کې یې د سولې چیغې ووهلې.
