افغانستان بوییچه بیرلشگن ملتلر تشکیلاتی نینگ اورین‌باسرلیک هیأتی (یوناما) بیر گزارش ترقه‌تیب ایتیشیچه، میلادی 2020- ییل نینگ بیرینچی آلتی آیی‌ده افغانستان ده کوپینچه تینچ‌اهالی زوروانلیک‌لردن ضرر کورگن. یوناما نینگ گزارشی اساسیده، جاری میلادی ییل نینگ بیرینچی 6 آیی‌ده 3458 تینچ‌اهالی هلاک و یره‌لنگن کیم بو رقم‌دن 1282 ته‌سی هلاک و باشقه 2176 ته‌سی ایسه یره‌لنگن.
بوگون (دوشنبه 6- اسد) یوناما تامانیدن نشر قیلینگن گزارش گه کیلیشیچه، تینچ‌اهالی نینگ تلفات میزانی 2019- ییل نینگ بیرینچی آلتی آیی گه قره‌گنده 13 فایز کمه‌یگن، بیراق حاضر هم افغانستان نینگ اوروشی دنیا بوییچه تینچ‌اهالی اوچون اینگ قانلی اوروش بولیب قالگن.
یوناما نینگ گزارشی اساسیده، جاری میلادی ییل نینگ بیرینچی آلتی آیی گه تینچ‌اهالی تلفاتی 13 فایز کمه‌یشی نینگ اصلی سببی، دنیا حربی کوچلری و عراق و شام اسلامی دولتی (داعش نینگ خراسان شاخه‌سی) نینگ عملیات‌لری کمه‌یگنی دییلگن.
یوناما نینگ گزارشی‌ده افغانستان اوچون بیرلشگن ملتلر تشکیلاتی نینگ باش کاتب‌لیگی نی خاص نماینده‌سی دبیرا لاییز دن نقل قیلیب یازیلیشیچه، افغانستان حکومتی و طالبان گروهی افغانستان‌لیکلرارا سوزلشوولر اوچون تیارگرلیک آلیش بیر حالده، اَچیق حقیقت بو دیر کیم اوروش هر کون تینچ‌اهالی گه ضرر ییتیشتیره‌دی.
خانم لاینز نینگ کوپه‌یتیریشیچه: «مین اوروش تامان‌لریدن افغانستان تینچ‌اهالیسی گه ضرر ییتیشتیره‌دیگن حادثه‌لر توغریسیده فکر قیلیب و توغری بیر قرار آلیش بیلن مذاکره میزی گه حاضر بولیش‌لرینی سوره‌یمن.»
یوناما نینگ گزارشی اساسیده، تینچ‌اهالی تلفاتی نینگ کوپینچه مسئولی دولت گه قرشی گروه‌لر دیر. بو گزارش گه کیلیشیچه، طالبان آرقه‌لی تینچ‌اهالی نینگ تلفات رقمی یوناما تامانیدن قید ایتیلگن.
یوناما نینگ ایتیشیچه، تینچ‌اهالی تلفاتی نینگ 58 فایزی گه دولت گه قرشی عنصرلر سبب بولگن. بو گزارش اساسیده، طالبان بو تلفات نینگ 43 فایزی گه سبب بولگن و 2020- ییل نینگ بیرینچی آلتی آیی‌ده 580 تینچ‌اهالی نی اولدیرگن و 893 تینچ‌اهالی نی یره‌لنتیرگن.
گزارش گه کیلیشیچه، افغانستان امنیتی کوچلری گه نسبت بیریلگن تینچ‌اهالی تلفاتی 9 فایز کوپه‌یگن. یوناما نینگ ایتیشیچه، 2020- ییل نینگ بیرینچی آلتی آیی‌ده تینچ‌اهالی تلفاتی نینگ 23 فایزی گه امنیتی کوچلر سبب بولگن.
گزارش گه کیلیشیچه، جاری میلادی ییل نینگ بیرینچی آلتی آیی‌ده تینچ‌اهالی تلفاتی نینگ 40 فایزی نی عیاللر و باله‌لر تشکیل بیره‌دی و بو پیتده 398 عیال و 340 باله هلاک ایتیلگن و شونینگدیک 259 عیال و 727 باله ایسه یره‌لنتیریلگن.
گزارش نینگ کوپه‌یتیریشیچه، کرونا ویروسی رواجلنگن بیرچاغده، افغانستان‌لیک باله‌لر اوروش تامان‌لریدن اوروش وظیفه‌لری اوچون استعمال بولیش خوفی بیلن قرار تاپگن.
گزارش گه کوره، بو پیتده هیچ بیر تینچ‌اهالی تشقی کوچلر تامانیدن هلاک و یره‌لنتیریلمه‌گن.
یوناما بو گزارش نینگ بیر بولیمی ده ایتیشیچه، تینچ‌اهالی، مذهبی رهبرلر، ساغلیک مرکزلر، عدلی و قضایی ارگان اعضالری، مدنی فعاللر، خصوصی نهادلر ایشلاوچی‌لری و خبرچیلر هجوم آستیده آلینیشی‌دن خواطرگه دیر.
