د فوټبال نړيوالې شورا (فیفا) د افغانستان په فوټبال فدراسیون کې تر ډېرو جنجالونو وروسته د فوټبال مخکینی روزونکی یوسف کارګر د یاد فدراسیون رییس وټاکه.
یوسف کارګر د افغانستان د فوټبال ملي لوبډلې پخوانی روزونکی دی چی اوس په فوټبال فدراسیون کې تخنیکي مرستیال و .
د فوټبال نړیوالې شورا له خپلې رسمي وېبپاڼې د افغانستان د فوټبال فدراسیون د پخواني رییس کرامالدین کریم نوم لرې کړی او پر ځای یې د محمدیوسف کارګر نوم لیکلی دی.
په همدې حال کی د سکرټرجنرال سیدعلي رضا اغازاده نوم هم لرې شوی او پر ځای یې فاضل شهاب د نوي سکرټر جنرال په توګه اعلان کړی دی.
دغه راز یوسف کارګر ته د رییس د مرستیال او فاضل شهاب ته د مالي چارو مسوولیت هم ورسپارل شوی، خو افغان فوټبال فدراسیون بیا د (فیفا) د پریکړې په اړه څه نهدي ویلي.
د یادونی ده چې د افغانستان د فوټبال فدراسیون د رییس او سکرټرجنرال دندې له ۲ نورو غړیو سره یوځای د افغانستان د لویې څارنوالي لهخوا ځنډل شوې دي.
د فوټبال نړیوالې شورا د فوټبال فدراسیون د رییس کرامالدین کریم دنده هم ځنډولې چې د ښځینه فوټبال ملي لوبډلې لهخوا پر نوموړي د لګېدلیو جنسي او فزیکي ځورونې د تورونو پلټنه وکړي.
د افغانستان په فوټبال فدراسیون کې د دې بدنامۍ له کبله د یاد فدراسیون رهبرۍ د دندو ځنډولو ترڅنګ، فدراسیون د خپلو جامو او مالي ملاتړ کوونکیو ملاتړ هم له لاسه ورکړ.
د جامو د مالي ملاتړ کوونکي په توګه تر ډنمارکۍ «هومیل» کمپنۍ وروسته د افغانستان مهم مالي ملاتړ کوونکي «الکوزي» شرکت هم پرون له افغان فوټبال فدراسیون سره خپل مالي ملاتړ لغوه کړ.
د یادونې ده چې د الکوزي نړیوال شرکت افغان فوټبال فدراسیون ته هر کال په هېواد کې د سپورټي اسانتیاوو، لوبو او تمریناتو لپاره ۸ نیم لکه امریکایي ډالر ورکول.
