اوتگن "سه‌شنبه" کونی ایرته‌لب ساعت 10 اطرافیده قوراللی هجومچی‌لردن بیرقطاری کابل نینگ دشت‌برچی منطقه‌سیده جایلشگن 100 یاتاق‌لیک کسلخانه‌ده کیریب عیال‌لر و باله‌لر شامل 30 کیشی‌نی اوققه توتگن.
ایچکی ایشلر وزیرلیگی مسوول‌لری نینگ اعلان قیلیشیچه، بو واقعه‌ده 16 کیشی هلاک و باشقه 16 کیشی یره‌لنگن، بیراق گواه‌لرنینگ ایتیشیچه، مذکور واقعه‌ده قربان بولگن‌لرنینگ سانی کوپ دیر.
گواه‌لردن بیری عارف نینگ ایتیشیچه، اوتگن کونی تنه‌سیده حربی کییم بولگن ایکی کیشی کسلخانه نینگ کیریش ایشیگی‌ده بیرعیال و بالهنی اوققه توتگنی‌دن سونگ، کسلخانه‌گه کیرگنلر. اونینگ ایتیشیچه، محل‌ده بولگن پولیس رنجرلری قاچیب کیتگن‌لر و باشی کیسیلگن 6 باله نینگ جسدی‌نی اوز کوزلری بیلن کورگن.
اوشبو هجوم‌دن حیات‌ده قالگن آنه‌لر و باله‌لر آتاترک باله‌لر کسلخانه‌سیگه انتقال بیریلگن.
آتاترک باله‌لر کسلخانه‌سی نینگ باش طبیبی جنت‌گل عسکرزاده نینگ ایتیشیچه، 20 باله بو کسلخانه‌گه انتقال بیریلگن و بوجمله‌دن 5 ته‌سی نینگ آنه‌سی حیات‌ده و باشقه‌لری نینگ آنه‌لری هلاک ایتیلگن.
مذکور واقعه‌دن حیات‌ده قالگن عیال‌لردن بیری حبیبه نینگ ایتیشیچه، ایکی عیال بیلن کسلخانه نینگ عاجل بولیمیده ایدی و ولادتی‌دن 20 دقیقه اوتگن بیرچاغده، قوراللی کیشی‌لر هجوم قیلیب او بیلن اتاق‌ده بولگن ایکی عیال‌لرنی اولدیرگن؛ بیراق معجزه‌لی شکلده اونگه قرشی اوق آتمه‌گن.
کابل غربی‌ده بولگن کسلخانه‌ده اویوشتیریلگن هجوم کوپ قطار واکنش‌لر بیلن روپه‌ره بولگن. خلق ارا کیچیریم تشکیلاتی نینگ بیر اعلامیه آرقه‌لی ایتیشیچه، مذکور هجوم مسوول‌لرینی قانونگه تاپشیریلیش‌لری کیره‌ک.
شونینگدیک، آمریکا تشقی ایشلر وزیری مایک پامپیو نینگ اوشبو هجوم‌نی قاره‌لب توییتر صحیفه‌سیده یازیشیچه، افغانستان اهالیسی‌نی تروریسم‌گه قرشی متحد بولیش‌لری لازم.
