افغانستان ایچکی ایشلر وزیرلیگی نینگ ایتیشیچه، کابل غربی ده جایلشگن دشت برچی یوز یاتاقلیک ملی کسلخانه گه قوراللی هجومچی‌لرنینگ هجومی ده 4 تینچ اهالی هلاک ایتیلگن. مذکور وزیرلیک نینگ هجوم دن 3 ساعت کیین نشر قیلینگن اعلامیه‌سیده کیلیشیچه، حاضرگه‌قدر واقعه محلی دن 8 یره‌لی کسلخانه گه انتقال بیریلگن.
اوشبو واقعه گواهلری بو هجوم ده قربان بولگن‌لرنینگ رقمی‌نی بوندن آرتیق دییشه‌دی. اجتماعی ترماقلرده نشر قیلینگن صورت‌لرگه کوره، هجومچی‌لر چقه‌لاقلرنی اوققه توتگن.
ایچکی ایشلر وزیرلیگی، کسلخانه گه اویوشتیریلگن هجوم نی انسانیت گه قرشی جنایت دیب و انسان حقوقی بوییچه تشکیلات‌لردن بو جنایت نی جدی شکلده تیکشیریشی‌نی سوره‌گن.
محل اهالیسی نینگ ایتیشیچه، هجوم باشلنگنیدن 3 ساعت اوتگن، لیکن حاضرگه‌قدر هجومچی‌لر توخته‌لیب اوق آتیشه‌دی.
ایچکی ایشلر وزیرلیگی نینگ اعلامیه‌سیده کیلیشیچه، حاضرگه‌قدر هجومچی‌لردن بیری هلاک ایتیلگن و خوفسیزلیک کوچلری بو هجوم گه نقطه قوییش اوچون سعی و حرکت قیله‌دی.
ایچکی ایشلر وزیرلیگی سوزلاوچیسی طارق آرین نینگ هجوم باشلنگن چاغیده ایتیشیچه، خوفسیزلیک کوچلری کسلخانه ده بند قالگن 40 عیال و باله نی قوتقرگن.
اوشبو هجوم مسؤولیتی‌نی حاضرگه‌قدر هیچ بیر گروه یا-ده کیشی بوینیگه آلمه‌گن. طالبان گروهی سوزلاوچیسی نینگ اوز توییتر صحیفه‌سیده یازیشیچه: «کابل شهری نینگ دشت برچی منطقه‌سیده اویوشتیریلگن هجوم بو گروه تامانیدن اویوشتیریلمه‌گن.»
عبدالله عبدالله کابل غربی ده ساغلیک مرکزی گه اویوشتیریلگن قوراللی هجومنی انسانیت گه قرشی دیب ایتیشیچه: «عامه‌وی مکان گه بولگن هجوم اوروش جنایتی دیر و بو ایش بوتون انسانی، اخلاقی و اسلامی ارزشلرگه قرشی بولگن.»
شونینگدیک، جمهور رئیس مصلحتچیسی وحید عمرنینگ ایتیشیچه، اوتگن 24 ساعت جریانیده کابل شهری نینگ دشت برچی منطقه‌سی، ننگرهار و لغمان ده اویوشتیریلگن هجوملر «کیچیریلمس و اونوتیلمس جنایت دیر.» او، طالبان و داعش گروهی نی اوتگن بیر کیچه-کوندوز ده یوز بیرگن جنایت‌لرنی عاملی دییدی.
عین حالده، اجتماعی ترماقلرنی ایشلاوچی‌لریدن بیرقطاری، عامه‌وی ییرلر و تینچ اهالی گه قرشی اویوشتیریلگن هجوم نی انسانیت گه قرشی جنایت دیب و انسان حقوقی بوییچه تشکیلات‌لردن بوگون کابل و ننگرهارده یوز بیرگن قانلی واقعه‌لرنی جدی شکلده تیکشیریب و عامل‌لرینی ملی و خلق ارا محکمه‌لرگه تانیشتیریشی‌نی سوره‌گن.
