ولسمشر محمداشرف غني د شنبې په ماښام ارګ کې د ځوانانو د نړیوالې ورځې په مناسبت غونډې ته خبرو کې ویلي چې که نړۍ د افغان وګړیو پر برخلیک له چا سره معامله وکړي، دی به د رد ځواب ورکړي.
ولسمشر غني زیاته کړې، د ده حکومت حاضر نه دی چې چا ته باج ورکړي یا هم د خلکو پر راتلونکې معامله وکړي.
ولسمشر دغه راز د هېواد د روان ناورین په مدیریت کې د ځوانانو د رول په اړه خبرې کړي او له هغوی یې غوښتي چې که غواړي افغانستان کې د جمهوریت ستنې ټینګې پاتې شي، باید د خپل حکومت ملاتړ وکړي.
هغه د خپلو خبرو پر دوام ویلي چې افغان حکومت د جګړې په ډګر کې ماتې نه ده خوړلې، بلکې د سولې لپاره یې نرمښت ښودلی دی.
ولسمشر غني سوله د خلکو او حکومت تر ټولو لویه غوښتنه ګڼلې او ویلي یې دي چې سوله د افغان حکومت لومړیتوب دی، خو د اقتصادي پیاوړتیا، له کورونا سره د مبارزې، غوره حکومتولۍ او د قانون د واکمنولو لپاره به هم هڅې روانې وي.
