کنر ولایتی نینگ والیسی، ولایت نینگ قطار دین عالملری داعش حرکتی‌گه همکارلیک قیلیشی باره‌سیده خبر بیردی.
کنر محلی بلند مرتبه‌لی مسووللری، مذکور ولایت نینگ بیر قنچه دین عالملری باشقه ترورچی گروه‌لردن علاوه داعش جنگریلری بیلن هم توغریدن – توغری مناسبت قورگنلر دیدیلر.
رسمیلر، ولایت نینگ قطار دین عالملری یاشلرنی اسلامی دولت جنگریسی بولمیش داعش حرکتی‌گه قوشیلیش‌گه ترغیب قیله‌دی دیگنلر.
کنر ولایتی نینگ والیسی وحیدالله کلیمیزی بوگون (یکشنبه) اسدآباد تومنیده اوتکزیلگن ییغین‌ده چقیش قیلیب، دین عالملریدن داعش جنگریلری ظلمی توغریسیده جیم تورمس‌لیکلرینی سوره‌گن.
جناب کلیمیزی ولایت دین عالملریگه: «فطر، صدقه، واجب و مستحب باره‌سیده مسجد منبری آرقه‌لی موعظه قیله‌سیز؛ اما اولدیریش، اوغیرلیک، حرام و باشقه موردلر توغریسیده نیمه اوچون موعظه قیلمه‌ی‌سیزلر؟ بو قنده‌ی دینی عالملیک دیگن؟»
معین بیر دین عالمی نامینی تیلگه آلمه‌گن ولایت نینگ والیسی، دین عالملریدن دین مرکزلری زوروانلیک مرکزیگه ایلنمس لیگی اوچون موعظه قیلیش‌نی سوره‌گن.
جناب کلیمیزی، دین عالملریدن دولت‌گه قرشی بونده‌ی عمللریدن قول کوتارمه‌گن حالده، کیله‌جک پیامدلر یامان بولیشی حقیده آگاهلنتیرگن.
اما، کنر ولایتی نینگ دین عالملر کینگشی باشلیغی مولوی عبدالرحمان سلام‌وطندارگه بیرگن صحبتی‌ده بو خصوصده بیرار نرسه تیلگه آلمه‌گن. شونینگدیک ولایت نینگ بیر قنچه اهالیسی کنرده داعش جنگریلری‌نینگ فعالیتی آشگن لیگی توغریسیده خواطر بیلدیرگنلر.
بوندن نیچه کون آلدین ولایت امنیه قوماندانی کنر ولایتی‌ده ناقانونی قوراللی شخصلر سانی آشگن لیگی همده ترورچی شخصلرنی تربیه‌لاوچی مرکزلر کوپه‌یگنی توغریسیده خبر بیرگن بیر پیت‌ده ولایت والیسی دین عالملری داعش‌گه همکارلیک قیله‌دی دیگن گپ‌نی تیلگه آلگن.
