د ولسي جرګې ځینې غړي وایي، چې ورځ تر بلې د هېواد په بېلابېلو سیمو کې نا امنۍ ډیریږي، خو اداري پلاوی د عمومي غونډې له پاره کومه اجنډا نه لري.
له معمول سره سم د شنبې پر ورځ باید د ولسي جرګې عمومي غونډه نیول شوې وای، خو د ولسي جرګې غړي وايې، چې د اجنډا نه شتون له امله نن بې پلانه پاتې شول.
د یادې جرګې غړي په اداري پلاوي نیوکه کوي او وایي، چې په ډیرو ولایتونو کې امنیتي وضیعت ښه نه دی، خو اداري پلاوی د دې پرځای، چې امنیتي مسوولین راوغواړي په خپلو شخصي کارونو بوخت دي.
د ولسي جرګې غړې شکریه پیکار وایي، چې د کندوز وضیعت ډیر خراب دی، خو ولسي جرګه د عمومي غونډې له پاره هیڅ اجنډا نه لري.
د ولسي جرګې بله غړې فاطمه عزیزي بیا وایي، چې د ولسي جرګې عمومي غونډه د ځینو کړیو له خوا نه ده نیول شوې، ځکه چې هغوی نه غواړي د کندوز امنیتي ستونزې حل شي.
و مو غوښتل، چې په د د ولسي جرګې د اداري پلاوي نظر هم واخلو، خو له زیاتو اړیکو او هڅو وروسته بریالي نه شو.
