د کندهار په پنجوايي ولسوالي کې پر یوه موټر چې د یوه محلي قوماندان غمياغا د کورنۍ غړي پهکې سپاره وو، د سړک غاړې ماین چاودلی چې له کبله یې ۵ کسان وژل شوي او ۶ نور ټپیان دي.
د کندهار د امنیې قومنداني ویاند جمالناصر بارکزي سلاموطندار ته ویلي، یاده پېښه نن د یادي ولسوالي په زلخان سیمه کې شوې ده.
د نوموړي په وینا، په چاودنه کې د دغه محلي قومندان مور، پلار، دوه خویندې او یوه لور وژل شوې او شپږ نور ټپیان دي.
ویل کېږي چې د یادې کورنۍ غړي د یوې کوژدې مراسمو ته روان وو چې پر موټر یې د سړک غاړې ماین چاودېدلی دی.
غمیاغا د پولیسو هغه افسر دی چې پر ټولنیزو رسنیو یې د جنرال عبدالرازق څېرې ته د ورتهوالي امله شهرت موندلی دی.
ولسمشرۍ ماڼۍ په یوه خبرپاڼه کې دغه چاودنه غندلې او له طالبانو یې غوښتي چې له دولت سره د سولې مخامخ خبرواترو په درشل کې دې د ماینونو له اېښودلو لاس واخلي.
خبرپاڼې د ولسمشر محمداشرف غني له قوله دا برید خواشینوونکی بللی او پر وسلهوالو طالبانو یې غږ کړی چې تاوتریخوالی، په تېره د ماینونو اېښودل چې د ملکیانو د مرګژوبلي اصلي لامل ګرځي، ودروي او یوې تلپاتې سولې ه د رسېدو لپاره د سولې لویې مشورتي جرګې غږ ته لبیک ووايي.
