د نورستان د ولایتي شورا رییس انجینیر سعادالله پاینده زوی سلام وطندار ته ویلي، چې تېره ورځ د دولت مخالفو وسله والو د یاد ولایت پر کامدېش ولسوالۍ ډله ییز برید کړی، چې په نتيجه کې يې ۹ پولیس وژل شوي او ۳ نور ټپيان دي.
نوموړي زیاته کړه، چې له تېرو پنځوو کلونو راهیسې د ولسوالۍ ټول پرسونل د کامدېش په نامه کلي کې په دولتي چارو بوخت دي او نوره ټوله د کامدېش ولسوالۍ د وسله والو په ولکه کې ده.
د پاينده زوی په وينا په دغه جګړه کې ۹ وسله وال مخالفین وژل شوي او ۱۴ نور ټپيان شوي دي.
نوموړی خبرداری ورکوي، چې که افغان حکومت د نورستان ولایت کامدېش ولسوالۍ ته جدي پاملرنه ونه کړي، نو د وسله والو مخالفينو د جګړو له امله به د کامدېش اوسېدونکي له سختو ستونزو سره مخ شي.
په دې اړه د نورستان ولایت امنيتي چارواکي حاضر نه دي، چې رسنيو ته جزيات ورکړي، خو له دې وړاندې يې په کراتو ويلي، چې دوی د کامدېش ولسوالۍ د نيولو له پاره خاص عملياتي پلانونه په پام کې نيولي دي او ډېر ژر به دغه ولسوالۍ د وسله مخاليفینو له شتون څخه پاک کړي.
له دې وړاندې د نورستان امنيه قومندانۍ په کراتو ویلي، چې په کامدېش ولسوالۍ کې د داعش او وسله والو طالبانو په ګډون ګڼ شمېر نور بهرني جنګيالي هم اوسېږي.
له بل لوري وسله والو طالبانو په خپل ویب پاڼه کې بیا د جنګياليو د زیاته وژنو ادعا ردوي.
دوی برعکس ادعا کوي، چې د نورستان په کامدېش کې د بریدونو له امله ۱۲ تنه پولیس وژلي او ۹ نور يې ټپيان کړي دي.
دوی دغه بریدونه د عزم عملیاتو یوه برخه ګڼلې او زیاته کړې يې ده، چې دغه جګړه څو ساعته دوام وکړ.
د وسله والو طالبانو د خبر له مخې په یاده جګړه کې يې ۲ جنګيالي وژل شوي او ۴ نور يې ټپيان دي.
کامدېش د نورستان په ختیځ کې د پاکستان سره پرته سرحدي ولسوالي ده، چې چې تل د وسله والو تر بریدونو لاندې پکې دولتي چارواکي او سيمه ییز اوسیدونکي شپې سبا کوي.
