.jpg)
افغانستان سیلاولر شکایت‌لرینی تینگلش کمیسیونی، کابل نماینده‌لر کینگشی سیلاوی‌نینگ آوازلرینی «کینگ تقلب و ساخته‌کارلیک» باعث، بیکار قیلدی.
بوگون «پنج‌شنبه» کابل‌ده خبری بیر ییغین اوتکزگن مذکور کمیسیون سوزلاوچیسی علی‌رضا روحانی‌نینگ ایتیشیچه، بو قرار دقیق تیکشیروولردن سونگ آلینگن.
کابل نماینده‌لر کینگشی سیلاوی‌نینگ آوازلری بایومتریک سیستمه‌سیدن فایده‌لنیش‌ده ایریم قیین‌چیلیک‌لر یوز بیرگنی، کابل‌ده چمه‌سی 3 مینگ شکایت رویخط‌گه آلینگنی، کابل‌ده ساخته‌کارلیک قیلگن‌لرنینگ اعترافی و آوازلرنی سنه‌ش‌ده یوز بیرگن قیین‌چیلیک‌لر باعث، بیکار قیلینگن.
شونینگدیک، سیلاولر کمیسیونی مسؤوللریدن بیرقطاری، وظیفه‌ده بی‌فرق یانده‌شگن‌لری سبب وظیفه‌لریدن چیکلنتیریلیب و نقد جریمه قیلینگن‌لر.
.jpg)
سیلاولر کمیسیونی‌نینگ دبیرخانه باشلیغی احمدشاه زمانزی، کابل‌ده سیلاولر کمیسیونی‌نینگ سابق باشلیغی اول‌الرحمان رودوال، سیلاولر ایرکین کمیسیونی‌نینگ ساحوی عملیات باشلیغی زمری قلمیار، سیلاولر ایرکین کمیسیونی‌نینگ عملیاتی اورین باسری عبدالعزیز صمیم و سیلاولر کمیسیونی‌نینگ معلوماتی تکنالوژی باشلیغی سید ابراهیم سادات وظیفه‌لریدن چیکلنتیریلگن کیشی‌لر جمله‌سیدن دیر. سیلاولر ایرکین کمیسیونی‌نینگ سوزلاوچیسی گه کوره، مذکور کیشی‌لرنینگ مدیریت سیزلیگی، سیلاو قاعده‌لری و قانون گه قرشی یانده‌شگن‌لری سبب کینگ شکلده تقلب و ساخته‌کارلیک یوز بیرگن.
شکایت‌لرنی تینگلش بولیمی‌ده سیلاولر شکایت‌لرینی تینگلش کمیسیونی‌نینگ قراری نهایی بولگن، بیراق بو توغریده سیلاولر ایرکین کمیسیونی‌نینگ قراری حاضرگچه مشخص ایتیلمه‌گن.
قانون اساسیده، بیر حوزه‌نی سیلاوی قاره‌لنگن صورتده، سیلاولر ایرکین کمیسیونی قیته‌دن بیر هفته‌ده مذکور حوزه ده سیلاو یولگه قوییشی کیره‌ک.
کابل ولایتی‌ده نماینده‌لر کینگشی سیلاوی اوچون 804 کیشی نامزد بولگن ایدی و بو جمله‌دن یالغیز 33 کیشی نماینده‌لر کینگشی گه یول تاپه آله‌دی.
