د افغانستان د ملي امنیت له لورې خپاره شوي معلومات په ډاګه کوي، چې په کابل کې د حقاني شبکې عمومي مشر او دهغه نور ۶ ملګري د ځانګړو عملیاتو پر مهال نیول شوي دي.
په خبرپانه کې راغلي، چې دغې ډلې تازه پلان درلود په کابل کې ښار کې ستر برېدونه ترسره کړي.
کابل له پاره د حقاني شبکې عمومي مشر خالد نوميږي، چې په پلازمینه کابل کې یې د دې ډلې له خوا بریدونه رهبري کول، چې د " هوا شناسي، حامد کرزي هوايي ډګر دراوزې، او د شهید مسعود له څلور لارې تر هوایي ډګره پر سړک" ځانمرګي بریدونه طرح کړي وو.
په نیول شوې ۷ کسیزه ډله کې د حقاني شبکې د کابل د تبلیغاتو مسول عصمت الله، د چاودېدونکو توکو د ډکو وسایطو ساتونکی نور الله، دځانمرګو بریدونو ساتونکی ولید، د حقاني شبکې غړي بهادر او خوشال د کابل د نهمې ناحیې د هودخیلو سیمې څخه نیول شوي دي.
د ملي امنیت له لورې په خپره شوې یوې ویډیو کې نیول شوي تورن د حقاني شبکې سره د تړون اعتراف کوي او همدا ډول په دې ویډیو کې هغه ځایونه ښودل کيږي، چې دې ډلې په چاودېدونکي توکي خوندي کول.
له دې سره د یادو ترهګرو له پټن ځای څخه ۱۴۰ کیلوګرامه چاودېدونکي توکی، دوه بنډله چاودېدونکې فلیته، د رېموټ کنټرول ۱۶ تختونه، څلور رېموټ کنټرولونه، د مبایل څلور سېټونه چې له هغو یې په چاودنو کې ګټنه کوله، څلور برېښنايي چاودېدونکي کپسولونه، یو میل تفنګچه د ملي امنیت ځواکونو ته په لاس ورغلي دي.
تر دې وړاندې د پلازمینې کابل په مهمو ځایونو کې د سترو برېدونو او چاودنو پلانونه هم د حقاني شبکې له لورې ترسره شوي وو، دغه شبکه د امریکا په تور لېست کې ځای لري او په وار وار سره یې له پاکستاني چارواکو غوښتي چې ددې ډلې په خلاف کوټلي ګامونه پورته کړي.
دکابل د شاشهید په سیمه کې ورستۍ چاودنه هم د همدې ډلې له لورې ترسره شوې وه چې بیا د افغانستان او پاکستان ترمنځ د اړیکو د ترینګلتیا سبب شوه.
په همدې حال کې تېره ورځ د سرحدي لوا د عمومي قواماندانۍ مخې ته په یوې چاودنه کې نږدې ۲۰ تنه ووژل شول او نږدې ۲۹ تنه نور ټپیان شول، چې دبرید مسولیت وسله والو طالبانو په غاړه اخیستی و.
