اوتگن هفته کابل بیلیم یورتی یاتاقخانه‌سی‌نینگ اوقووچیلرینی آره‌سیده یوز بیرگن تارتیشمه نماینده‌لر کینگشی اعضالریدن بیرقطاری‌نینگ عکس‌العملی گه سبب بولدی.
نماینده‌لر کینگشی اعضالری، کابل بیلیم یورتی کبی علمی مرکز و اکادمیک بیر ییرده بونده‌ی بیر واقعه یوز بیرگنینی تأسف‌لی بیلیب و اوقووچیلردن بیرقطارینی جنجل و تارتیشمه چیقاریش گه عیب‌لگن‌لر.
نماینده‌لر کینگشی‌ده غزنی اهالیسی‌نی نماینده‌سی محمدعلی اخلاقی‌نینگ ایتیشیچه، عالی اوقوو وزیرلیگی تشقریدن بویروغ آله‌دیگن‌لرنینگ آلدینی آلیشی کیره‌ک.
نماینده‌لر کینگشی اعضالریدن بیرقطاری، بیلیم یورت گه قورال آلیب باریلگنینی سوراقلی بیلیب ایتیشیچه، عالی اوقوو وزیرلیگی نماینده‌لر کینگشی گه چقیریلیب و بو توغریده جواب بیریشی لازم.
نماینده‌لر کینگشی اعضالری‌نینگ ایتیشیچه، بو موضوع تیکشیریلیشی کیره‌ک و قومی، مذهبی و تیل تعصباتی گه قول اورگن‌لر تانیلسین‌لر.
نماینده‌لر کینگشی باشلیغی عبدالرؤوف ابراهیمی، کابل بیلیم یورتی‌ده یوز بیرگن تارتیشمه نتیجه‌سیده بیر اوقووچی هلاک ایتیلگنی و باشقه 19 اوقووچی یره‌لنگنینی کته بیر مصیب بیلیب و نماینده‌لر کینگشی‌نینگ دین، مدنیت، معارف و عالی اوقوو ایش‌لری خصوصیده بولگن کمیسیونی گه عالی اوقوو وزیری‌نی بو توغریده جواب بیریش اوچون نماینده‌لر کینگشی گه چقیریشی اوچون بویروغ بیردی.
بیراق، عالی اوقوو وزیرلیگی‌نی سوزلاوچیسی فیصل امین نینگ ایتیشیچه، کابل بیلیم یورتی‌ده یوز بیرگن تارتیشمه ده هیچ بیر اوقووچی هلاک ایتیلمه‌گن؛ بلکیم دهبوری تورت یولیده یوز بیرگن آتیشمه‌لرده رحمان بابا یوکسک مکتبی‌نینگ اوقووچیلریدن بیری هلاک ایتیلگن و بیلیم یورت ایچیده یالغیز 4 اوقووچی یره‌لنگن.
اونگه کوره، بو واقعه عیبدارلری قانون اساسیده تیرگاوگه آلینه‌دی.
دیمک، اوتگن هفته پنج‌شنبه کونی کابل پولیسی‌نینگ تصدیقی اساسیده، کابل بیلیم یورتی‌نینگ اوقووچیلرینی آره‌سیده آوقت نوبتی اوستیگه یوز بیرگن تارتیشمه‌ده بیر اوقووچی هلاک ایتیلگن و باشقه نیچه اوقووچی یره‌لنگن.
اوشبو واقعه‌دن بیر کون کیین کابل پولیسی بو واقعه توغریسیده کابل بیلیم یورتی اوقووچیلریدن 35 ته‌سی قولگه آلینگنیدن خبر بیرگن ایدی.
عین حالده، نماینده‌لر کینگشی اعضالریدن بیرقطاری‌نینگ ایتیشیچه، کابل بیلیم یورتی‌ده بیر اوقووچی هلاک ایتیلگن موضوعی جدی شکلده تیکشیریلمه‌گن صورتده، بو ایش مملکت‌نینگ باشقه بیلیم یورت‌لری اوستیگه هم سلبی تأثیر قوییشی ممکن.
