اوتگن کیچه قوراللی طالب‌لر کابل برقی‌نی تأمین‌له‌یدیگن برق پایه‌لریدن بیرینی بغلان ولایتی‌نینگ دوشی تومنی کیله‌گی منطقه‌سیده ییقیتگن.
بغلان ولایتی‌نینگ برق ریاستی مسؤوللری‌نینگ ایتیشیچه، قوراللی طالب‌لر برقی اسکونه و چرخ ماشینی‌دن فایده‌لنیب مذکور برق پایه‌نی اوچ باغله‌نیش واحدینی کیسگن و اوندن سونگ، تورتینچی واحدنی پارتله‌تیب و پایه‌نی ییقیتگن.
سلام‌وطندارگه صحبت بیرگن بغلان ولایتی‌نینگ برق ریاستی باشلیغی سلطان‌احمد عزیزی‌نینگ ایتیشیچه، پایه ییقیتیلگن منطقه‌ده پایه‌نی قیته قوریش اوچون آغیر اسکونه‌لرنی انتقال بیریش جوده قیین دیر؛ بیراق برق شرکتی مسؤوللری، کابل برقی‌نی بیر «سرکیت» آرقه‌لی وقتینچه‌لیک باغلش گه سعی و حرکت قیله‌دی.
عزیزی‌نینگ ایتیشیچه، اولر نیاز بولگن اسکونه‌لرنی بو منطقه گه انتقال بیریش اوچون سعی و حرکت قیله‌دیلر. اونگه کوره، مذکور پایه‌نی قیته قوریش و باغلش ممکن دیر، بیراق نیچه کون وقت آله‌دی. او، امنیتی کوچلردن منطقه خوفسیزلیگی‌نی تأمین‌لشینی سوره‌یدی.
عین حالده، دوشی تومنی‌نینگ پولیس قومندانی آغامیر غفوری، منطقه‌ده طالبان حضورینی تصدیقلب ایتیشیچه، حربی و پولیس کوچلریدن تشکیل ایتیلگن قوشمه کوچلر خوفسیزلیک‌نی تأمین‌لش اوچون منطقه گه یوباریلگن.
بوندن آلدین قوراللی طالب‌لر، قوشنی مملکت‌لردن کیله‌دیگن برق پایه‌لری قوندیریلگن منطقه اهالیسی گه برق بیریلمه‌گن صورتده، پایه‌لرنی ییقیتیشی توغریسیده آگاه‌لنتیرگن ایدی.
