دوشنبهدن سهشنبه گه اوتر کیچه آزمه-کوپ ساعت 7:10 ده، کابل شهرینینگ 9- ناحیهسی چیتایللیکلرنینگ مهمانخانهسینی یقینیده کوچلی بیر پارتلش یوز بیردی.
ساغلیقنی سقلش ریاستینی سوزلاوچیسی وحیدالله مایارنینگ ایتیشیچه، کابل شهرینینگ 9- امنیتی حوزهسیگه تیگیشلی جلالآباد سرکیده جایلشگن گرین ویلیج کمپیده یوز بیرگن کوچلی پارتلش نتیجهسیده 4 کیشی هلاک و باشقه 113 کیشی یرهلنگن.
مایارگه کوره، اوشبو واقعهده قربان بولگنلرنینگ برچهسی تینچ اهالی بولگن و یرهلنگنلردن کوپینچهسی اویلرینینگ شیشهلری سینگنی باعث یرهلنگن و آیاق اوستی دارولنگنلریدن سونگ، کسلخانهدن رخصت بیریلگن.
عین حالده، ایچکی ایشلر وزیرلیگینینگ سوزلاوچیسینی اورین باسری نصرت رحیمینینگ ایتیشیچه، اوشبو پارتلش قربانلرینینگ برچهسی تینچ اهالی دیر.
اونگه کوره، واقعه قندهی بیر شکلده یوز بیرگنی توغریسیده تیکشیروولر باشلنگن و وظیفهلری توغریسیده بیفرق یاندهشگنلر جزالنتیریلهدی.
شونینگدیک، مملکت جمهور رئیسی محمداشرف غنی، بیر اعلامیه صادر قیلیب اوتگن کیچه یوز بیرگن هجومنی قتیق قارهلب و تینچ اهالی نشانگه آلینیشینی انسانیت و اسلامیت گه قرشی بیر عمل دیگن.
جمهور رئیس غنی، امنیتی ادارهلرگه یوز بیرگن واقعه تیکشیریلیشی خصوصیده بویروغ بیرگن.
ناتو تشکیلاتی هم بیر اعلامیه آرقهلی یوز بیرگن هجومنی قتیق قارهلب و قربان بولگنلرنینگ عایله اعضالریگه قیغوداشلیک بیلدیرگن.
ناتو تشکیلاتینینگ اعلامیهسیده ایتیلیشیچه، قوراللی طالبلر اهالیگه قرشی زوروانلیکلردن قول تارتیب و مذاکره میزی اوستیگه حاضر بولیشی کیرهک.
اوشبو اعلامیهده کیلیشیچه، ناتو تشکیلاتی ترورچیلرگه قرشی کورهش و تینچلیککه زمینه یرهتیلیشی خصوصیده، افغانستان حکومتی و امنیتی کوچلریدن حمایت قیلهدی.
طالبان گروهی بیر خبرنامه صادر قیلیب اوشبو واقعه مسؤولیتینی بوینیگه آلگن و ادعا قیلیشیچه، یوز بیرگن هجوم مذکور گروهنینگ «معتصم لوگری» آتلی بیر خودکش هجومچیسی تامانیدن عمل گه آشیریلگن.
