ایچکی ایشلر وزیرلیگی‌نینگ ایتیشیچه، کابل شهری‌نینگ 9- حوزه‌سیده بمب جایلشتیریلگن تونس موتر پارتلشی عاقبتی‌ده، 10 کیشی هلاک و باشقه 42 کیشی یره‌لنگن.
ایچکی ایشلر وزیرلیگی سوزلاوچیسی نصرت رحیمی فیسبوک صحیفه‌سیده یازیشیچه، بوگون «پنج‌شنبه» ایرته‌لب ساعت 10:10 اطرافیده بم جایلشتیریلگن بیر تونس موتر 9- خوفسیزلیک حوزه گه تیگیشلی بیرینچی مکروریان عمومی جاده‌سیده عبدالحق تورت یولی‌نینگ یقینلیگیده پارتله‌گن.
جناب رحیمی گه کوره، شونینگدیک اوشبو حادثه نتیجه‌سیده، 12 تینچ‌اهالی موتری تخریب بولگن.
حادثه مسئولیتی نی طالبان بوینیگه آلگن.
طالبان گروهی سوزلاوچیسی ذبیح‌الله مجاهد توییتر صحیفه‌سیده یازیشیچه، مذکور پارتلش کابل شهریده 40- استخبارات ریاستی‌نینگ قراول تیزیمی یقینلیگیده یوزبیرگن و اونینگ مقصدی چیت‌ایللیک کوچلر کاروانی ایکن.
شو توغریده:
- کابلده یوز بیرگن پارتلش نتیجه‌سیده، 16 کیشی هلاک ایتیلگن
کابلده یوز بیرگن خودکش هجوم عکس‌العمل‌لرگه سبب بولدی
بونده‌ی بیر پارتلش یوزبیرگن حالده، جاری هفته یکشنبه کونی پارتلش ماده جایلشتیریلگن بیر تراکتور کابل شهری‌نینگ 9- خوفسیزلیک حوزه‌سیده‌گی قابل‌بای منطقه‌سیده جایلشگن «گرین ولیج» کمپی نی نشانگه آلدی.
ایچکی ایشلر وزیرلیگی مذکور هجوم‌ده تینچ‌اهالی شامل 16 کیشی نینگ هلاک و باشقه 119 کیشی یره‌لنگنینی تصدیقله‌گن ایدی.
مذکور پارتلش‌ده بیر تیل تانکی اوت گه یاندی.
شونینگدیک اوشبو هجوم مسئولیتی نی هم طالبان بوینیگه آلگن ایدی.
