بوگون توشدن آلدین ساعت 11 ده کابل شهریده پولیس کوچلرینینگ کاروانی انتحاری هجوم آستیگه آلیندی. عینی گواهلرنینگ سلاموطندارگه ایتیشلریچه، ایکّی خودکش عین پیتده کابل شهری نینگ بیشینچی حوزهسیگه قرهشلی منطقهده پولیس طلبهلری مینیلگن موترنی هجومگه توتگنلر.
پولیسنینگ کاروانی میدان وردک ولایتیدن کابلگه کیلگن پیتده هجوم آستیگه آلینهدی. ایریم منبعلر، اوشبو پولیس محصللری یقینده میدان وردک حربی اکادمینی بیترگنلیک لرینی معلوم قیلگن.
حادثهده یوز بیرگن تلفات توغریسیده هنوزگچه انیق معلومات قولده ایمس. عینی گواهلرنینگ سوزلریگه کوره، انتحاری هجومده اونلب حربی محصل قربان بولگنلیکلریدن علاوه تینچ اهالیگه هم تلفات ییتگن.
افغانستان ایچکی ایشلر وزیرلیگینینگ بیرگن معلوماتیده، هجومده 30 کیشی قربان بولیب 58 انسان تن جراحتی آلگن قید ایتیلگن.
ایچکی ایشلر وزیرلیگینینگ سوزلاوچیسی صدیق صدیقی، واقعهنی توییتر صحیفهسیده تصدیقلب، تروچیلر پولیس کوچلری کاروانینی نشانگه آلگن لیکلرینی اعتراف قیلگن.
طالبان بیر بیانات ترقهتیب واقعه مسوولیتینی بو حرکت ذمه سیگه آلگن. وردک حربی اکادمینینگ عسکرلری شمسالحق هراتی و محبالله هلمندیلر طرفیدن هجوم آستیگه آلینگنلر. شمسالحق دستلب اوزینی پارتلهتیب یوبارگن، سونگ محلدهگی باشقه عسکرلر توپلنگندن کیین ایکینچی حلمه صادر ایتیلگن .
