پېښو ته د رسېدو په چارو کې د دولت وزارت او کابل کې د چین سفارت، د افغانستان له وچکالۍ ځپلو سره د مرستې لهپاره هوکړهلیک لاسلیک کړ.
د دې هوکړې پر بنسټ به چین له افغانستان سره د ۳۰۱۶ ټنه وریجو او د ۸۱۶ ټنه اوړو مرسته کوي.
د افغان چارواکیو په وینا، ټاکل شوې دغه مرستې روان کال هېواد په زیان لیدونکیو کسانو ووېشل شي.
پېښو ته د رسېدو په چارو کې د دولت وزیر نجیب اقا فهیم وايي، وچکالۍ په شمال، شماللویدیځ، سویل لویدیځ او مرکزي سیمو کې ۲۰ ولایتونه تر اغېز لاندې راوستي دي.
د ښاغلي فهیم په وینا، دغو ولایتونو کې د وچکالۍ له امله څړځایونه لهمنځه تللي او د دغو ولایتونو کرنیز محصولات هم ۵۰ سلنه کم شويدي.
پېښو ته د رسېدو په چارو کې د دولت وزیر دا هم وویل چې د وچکالۍ اغېزې پراخې دي او د دولت سرچینې کمې دي چې دوی په همدې دلیل ګاونډیو او نورو هېوادونو څخه د مرستې غوښتنه کړېده.
ښاغلي فهیم زیاتوي، دا وخت ۳.۳۰ میلیونه څاروي د وښو له کمښت سره مخ دي او همدارنګه یو میلیون او ۴۰۰ زره انسانان بېړنیو مرستو ته اړتیا لري.
د ده په وینا، څه باندې ۳۰ زره کسانو سره به د سږ کال تر پایه مرستې وشي.
په ورته وخت کې افغانستان کې د چین سفیر لیوجنګ سونګ وايي، دغه مرستې د افغان دولت په غوښتنه شوېدي.
د ده په خبره، هېواد یې چمتو دی چې د طبیعي پېښو د مهارولو په برخه کې هم مرسته وکړي.
دغه مرستې داسې حال کې کېږي چې د ځېنو ولایتونو اوسېدونکي د وچکالۍ له ناوړه پایلو اندېښنه څرګندوي او دغې وچکالۍ ان ځېنې افغانان د خپلو کورونو پرېښودو ته اړ کړيدي.
