د پکتيا ولايتي شورا او مدني فعالان وايي، داسې اسناد يې تر لاسه کړي چې د پکتیا حوزوي روغتون د شپنیو نوکریوالانو نه پرته ۳۲ ډاکټران، نرسان او ضفاکاران د دې روغتون له خونو، امکاناتو او ډوډوۍ څخه د شپې له لوري ګته اخلي.
د پکتيا د ولايتي شورا غړي محمدالرحمان قادري او مدني فعال معروف افغان پهدې روغتون کې د داسې ډاکترانو د موجودیت ادعا هم کوي چې خپل ماشومان يې روغتون ته راوستي او د شپې له لوري په غيررسمي وخت کې له خونو او نورو امکاناتو استفاد کوي.
دوی زیاتوي، پهدې کسانو کې ۱۵ ډاکټران، ۹ تنه نرسان، پنځه صفاکار او نور روغتيايي کارکوونکي شامل دي چې هر تن په میاشت کې د شپې له لوري له ۵۰۰۰ افغانیو زيات مصارف لري چې دا ټول په غيرقانوني ډول د روغتون له امکاناتو ورکول کېږي.
د دوی په وینا، یو ډاکټر لا په ICU خونه کې ځانته له تشنابه خونه جوړه کړې هماغلته اوسېږي؛ پهداسې حال کې چې دې ډاکټرانو ته د موسېسو له لوري لوړ معاشونه ورکول کېږي.
د پکتيا روغتيايي مسئولين هم دا خبره مني، چې يو شمېر ډاکټران او نرسان د شپې له لوري پرته له نوکرې شپې تېروي، خو وايي، چې د دې ستونزې د هواري لهپاره يې تصميم نيولی چې د روغتیايي کارکوونکیو د شپې اوسېدو لهپاره بل مناسب ځای برابر کړي.
د پکتيا د عامې روغتيا ریيس ډاکټر دولتخان احمدزی پهدې اړه اړه وروستۍ پرېکړه نوې قراردادي موسېسې ته پرېږدي.
پکتيا کې يو شمېر متخصصن ډاکټران د نورو ولايتونو او يا د لېرې پرتو ولسواليو اوسېدونکي دي چې ډېری وخت د روغتون له خونو او نورو امکاناتو څخه شخصي ګټه اخلي.
