پکتیا ولایتی نینگ امنیتی بلند مرتبه‌لی رسمیلری، ولایت‌ده خذمت قیله دیگن حربی عسکرلر آیلیگی کَم بولگن لیگی باره‌سیده خبر بیرگنلر. پولیس عسکرلری آیلیگی کمه‌یتیریلیشی حربی کوچلرنینگ فعالیتی‌گه توغریدن – توغری سلبی تاثیر قیلگن دیدی امنیتی رسمیلر.
ولایت‌ده‌گی حربیلرنینگ آیلیگی کمه‌یتیریلیشی اوچون مرکزدن یوباریلگن مکتوبده « امنیت یخشیله‌نیشی و خوفسیزلیک تهدیدلری کمه‌یگنلیگی» حربی عسکلرنینگ آیلیگی کمه‌یتیریلیشی اوچون اساسی دلیل بولگنی یازیلگن.
اوروش چیزیغیده‌گی عسکرلردن بیری توریالی، داعش حرکتی نینگ اوروشی اوج آلگن بیر پیتده آیلیکلری کوپه‌یتیریلگنی اورنیده آیده 1500 کَم قیلینگن لیگینی تیلگه آلگن. توریالی‌گه کوره، بو خبرنی ایشیتگن‌دن بیری اوروش چیزیغی‌ده توریب جنگ قیلیش‌دن بوتونله‌ی کونگلی قالگن.
باشقه بیر حربی عسکر عبدالله‌گه کوره، آیلیگی قیسقرتیرلیگن لیگی توغریسیده‌گی دلیل «اورین سیز» بیر گپ دیر.
ولایت ملی کوچلری آیلیگی کمه‌یتیریلگن لیگینی اعتراف قیلگن پولیس قوماندانی توریالی عبدیانی، بو قرار اوزگیرتیریلیشی اوچون سعی وحرکت بار دیگن.
عبدیانی، ولایت‌ده ملی کوچلرنینگ آلیب بارگن فعالیتی سبب پکتیا خوفسیزلیک وضعیتی یخشی بولگن لیگینی تیلگه آلگن. لیکن، پولیس حربیلری‌نینگ آیلیگی کمه‌یتیریلیشی ملی کوچلر روحی‌گه سلبی تاثیر قوییشی ممکن دیگن او.
پکتیادن علاوه باشقه تورت ولایت ملی کوچلری‌نینگ آیلیک حقوقی کمه‌یتیریلگن لیگی ایتیله‌دی. افغانستان ایچکی ایشلر وزیرلیگی ملی پولیس کوچلری آیلیگی آزه‌یتیریلگن لیگی نینگ بیرینچی سببی اوشبو ولایتلرده برقرارلیک تامین بولگن لیگیدن کیلیب چیقه‌دی دیگن. بیراق، هنوز هم پکتیانینگ ایریم حدودلریده اوروش جریانی بارلیگی ایتیله‌دی.
