د عامې روغتیا وزات د وروستیو شمېر پر بنسټ، د کابل ښار ۶مې امنیتي حوزې اړوند د پېژندپاڼو وېش پر یو مرکز د پروني (یکشنبې) سهارني برید کې د ښځو او ماشومانو په ګډون ۶۲ تنه ووژل شول او ۱۱۹ تنه نور ټپيان شول.
د دغه برید زیاتره قربانیان زدهکوونکي او ولسي وګړي وو.
له پروني برید وروسته کورنۍ او زدهکوونکي وېرېدلي دي او ویل کېږي چې په دشتبرچي کې خال ـ خال ښوونځي رخصت شوي وو.
خو د پوهنې وزارت د خپرونو رییس کبیر حقمل سلاموطندارته وویل، ناامنۍ او د پېژندپاڼو وېش مرکزونو ته متوجه ګواښ د زدهکوونکیو کورنۍ اندېښمنې کړېدي.
هغه وايي، د ټاکنو په قانون کې په صراحت سره ویل شوي چې پوهنې وزارت باید لهدې پروسې سره همکاري وکړي چې تر اوسه لا د دوی همکاري روانه ده. ښاغلی حقمل زیاتوي، دوی د ښوونځیو رخصتېدو لهپاره هېڅ پروګرام نهلري او په ښوونځي کې لیکلوست په عادي توګه روان دی.
د پېژندپاڼو د وېش ادارې د عامه اړیکو رییسه رویینا شهابي د امنیتي ګواښونو نه په اندېښنې څرګندولو سره وايي، ډېر ژر به د پرونې برید په ترڅ کې د بندو شویو مرکزونو په بدیل کې د پېژندپاڼو د وېش ۲ نور مرکزونه پرانیزي.
د دې په خبره، اوس هم د پېژندپاڼو د وېش مرکزونه له امنیتي ګواښ سره مخ دي او په وینا یې له اوله یې پهدې تړاو امنیتي ارګانونو او لوړپوړیو چارواکیو سره اندېښنې شریکې کړېدي.
له بلېخوا د کورنیو چارو وزارت ویاند نجیب دانش وايي، د ټاکنو لهپاره د نوملیکنې او د پېژندپاڼو د وېش ټولو مرکزونو د ښه امنیت لهپاره له سره په مناسبو امنیتي پروګرامونو غور کوي.
د ده په وینا، د ټول هېواد په کچ هڅه کوي چې امنیتي ځواکونه د مرکزونو ښه ساتنه وکړي.
په ورته وخت کې د زدهکوونکیو کورنۍ په ښوونځیو کې د ټاکنو لهپاره د نوملیکنې مرکزونو په تړاو د اندېښنې په څرګندولو سره وايي، تر هغو چې حکومت د مرکزونو امنیت نه وي خوندي کړی؛ خپلو اولادونو ته اجاز ورنهکړي چې ښوونځیو ته لاړ شي.
