یقین‌ده روسیه جمهور رییسی ولادیمیر پوتین تامانی‌دن امضالنگن امنیتی حجت‌ده، امریکه قوشمه ایالتلری بو مملکت ملی امنیتی اوچون تهدید دیب معلوم قیلینگن. رویتز و سی‌ان‌ان خبر آژانس‌لیگی‌نینگ گزارشی‌ده یازیلیشیچه، مذکور حجت غرب و روسیه اورته‌سی‌ده جدی شکل‌ده ایشانچ‌سیزلیک بارلیگی‌نی معلوم قیله‌دی.
جناب پوتین « روسیه فدراسیون ملی امنیت» لایحه‌سی حجتی‌گه میلادی ینگی ییل‌ده قول قویگن. مذکور امنیتی حجت‌ده روسیه ملی خوف‌سیزلیک مساله‌سی‌گه عاید ناتو و امریکه‌نینگ سابقه‌سیز رولی بارلیگی تاکیدلنگن.
روسیه فدراسیون ملی امنیت خوف‌سیزلیک لایحه‌سی اساسی بیر طرح بولیب، بو مملکت‌نینگ ییریک حربی هدف‌لرینی تعین قیله‌دی. یقین‌ده پوتین قول قویگن حجت، 2006- ییل‌ده قول قوییلگن امنیتی حجت‌نینگ ینگی نسخه‌سی اورنک بولگنی ایتیله‌دی.
بو حجت‌نینگ بیر بولیمی‌ده یازیلیشیچه، امریکه و اروپا بیرلشمه‌سی اوکراین اساسی قانونی‌گه قرشی تونتریلیش‌نی حمایت قیلگن‌لر. شونینگ‌دیک مذکور حجت‌ده ناتونینگ حربی فعالیتی روسیه امنیتی اوچون هم ییریک تهدید سنلنگن. اما حجت‌ده روسیه بشارالاسدنی حمایت قیلیب، هوادن اوتکزگن هجومی توغریسی‌ده بیرار نرسه دییلمه‌گن.
روسیه حربی اوچاقلری اوتگن ییل‌نینگ اخیرگی آیلری‌ده داعش گروهی همده بشاراسدگه قرشی مخالف‌لر پوسته‌لرینی هجوم آستی‌گه آلگن ایدی. روسیه‌نینگ بو حرکتی غرب تامانی‌دن قتیق عکس‌العمل‌گه روپه‌ره بولدی. غرب اسدگه مخالف سوریه آزاد ملی کوچلرنامی گروه‌نی حمایت قیله‌دی.
روسیه‌نینگ ینگی خوف‌سیزلیک حجتی دنیاده‌گی معما همده توقنشوولر اوچون بو مملکت رولی‌نی اساسی کورستگن، اما مساله اوچون غرب دولتلری عکس‌ا‌لعمل بیلدیرگن.
غرب و روسیه دیپلوماتیک علاقه‌لری، روسیه حربی کوچلری 2014- ییل‌نینگ مارچ آیی‌ده اوکرایندهگی کریمه آرالی‌نی مذکور مملکت‌گه قوشگن بیر چاغده ترنگلشدی. روسیه‌نینگ بو اره‌له‌شیشی اوکراین‌ده ییریک ناراضیلیک نمایش اوتکزیلیشی همده بو مملکت جمهور رییسی روسیه قاچیشی‌گه باعث بولدی.
اوکرایندهگی ایچکی الغاو – دلغاولرده امریکه قوشمه ایالتلری شامل غرب دولتلری روسیه‌نی ترورچیلرنی حمایت قیلگن‌لیک‌ده عیب‌له‌دی.
بو مساله‌دن سونگ غرب و امریکه قوشمه ایالتلری روسیه‌گه قرشی ییریک تحریم‌لرنی صادر قیلدی و رسمی مسکو ایسه اروپا بیرلشمه‌سی‌دن کیلتیریه دیگن ییگولیک آذیق آوقت‌نی چیکلنتیردی.
