په ۹۴یم کال کې د افغانستان د روغتیايي حالت ارزونه

د افغانستان د عامې روغتیا وزارت چارواکي د پولیو ناروغۍ زیاتوالی او د فوق تخصصي ماموران نه شتوالی د روان ۱۳۹۴ کال اساسي ستونزې بولي.

د عامې روغتیا وزارت د نړیوالو اړیکو رییس او د دغه وزارت ویاند وحید مجروح سلام وطندار سره په مرکه کې وویل، سره له دې، چې په ۱۳۹۴ کال کې د روغتیا په برخه کې د ستونزو سره ـ سره بیا هم لاسته راوړنې لرلې.

مجروح وايي، چې د عامې روغتیا وزارت په روان لېږدیز کال کې ۵۴ خصوصي روغتونونه څېړلي دي او په ورځنیو معیارونو یې برابر کړي دي.

د ده په خبره، د عامې روغتیا وزارت د دولتي شفاخانو بېړنۍ څانګې یې بیارغولي او په نویو وسایلو یې سمبال کړي دي.

د دې وزارت ویاند وايي، په کابل کې د روغتونونو د روغتیايي خدمتونو څرنګوالي ارزول پای ته رسېدلي دي او اوس په ولایتونو کې د روغتونو د ارزول چارې روانې دي.

د عامې روغتیا وزارت مطبوعاتي مسوول وايي، چې دوی د پولیو سره د مبارزې له پاره د همغږۍ او کنټرول لومړنۍ مرکز جوړ کړی دی او د دې مرکز د کار له پیل سره به د پولیو په برخه کې موجودې ستونزې حل شي.

د عامې روغتیا وزارت همدا ډول وايي، چې دوی د معیاري روغتیايي خدمتونو د معیاري کولو له پاره د روغتیا قانون په تعدیل او د ډاکټرانو د فیس په کمولو کار پيل کړی دی.

دې وزارت د ۹۴ کال په وروستیو کې «موقتې طبي ملي شورا» جوړه کړه، چې غړي یې له بېلابېلو دولتي او نادولتي ادارو څخه ټاکل شوي دي.

دوی دنده لري، چې د ناروغانو د روغتیايي خوندیتوب، معیاري روغتیايي خدمتونو وړاندې کولو او د ډاکټرانو د ملاتړ له پاره کار وکړي.

مجروح وايي، چې د پاکستان هېواد په مالي مرسته درې روغتونونه جوړ شوي دي او څو میاشتې وروسته به ګټنې ته وړاندې شي او ټاکل شوې ده، چې د امریکا متحده ایالاتو په مرسته په ۹۵ کال کې دوه روغتونونه جوړ شي.

خو له بل لوري د افغانستان خلک له روغتیايي خدمتونو شکایت لري او اوس هم هر کال سلګونه خلک د درملنې له پاره بهرنیو هېوادونو ته ځي.

د «سردار محمد داودخان» روغتون په انګړ کې د یوې مېرمنې زېږون هغه پېښه وه، چې د زیاتو خلکو غوسې یې راوپارولې.

خو په ورته وخت کې د عامې روغتیا مسوولانو په دې روغتون کې د روغتیايي خدمتونو په رسولو کې هر ډول سستي رد کړه او دوه کسه یې په دې تور ونیول، چې د هغې مېرمنې انځورونه یې راویستي وو.

د عامې روغتیا وزارت د شمېرو له مخې په ټول افغانستن کې شاوخوا ۲۳ زره روغتیايي مزکرونه فعاله دي او یوازې ۶۵ سلنه افغانان روغتیايي خدمتونو ته لاس رسی لري.