د کندهار ولایت اتمې حوزې میرویس مېنې ته نېږدې نن سهار د (اپریل په ۲۱مه) شاوخوا ۸ بجې د یوې چاودنې له امله ۲ تنه ووژل شول او ۲۱ تنه نور ټپيال شول.
د کندهار د سر پرست والي ویاند صمیم خپلواک د پېښې پخلی کوي او وايي، چې
د پېښې د ډول او څرنګوالي په اړه کره معلومات نه لري.
د کندهار د میرویس ملکي روغتون رییس داود فرهاد سلام وطندار سره په خبرو کې وویل، چې تر دې دمه روغتون ته د پېښې له ځایه د دوو وژل شویو ملکي وګړیو جسدونه او ۲۱ تنه ټپیان چې ۸ یې پولیس دي؛ ور وړل شوي دي.
د دې پېښې مسوولیت تر اوسه کومې وسله والې ډلې پر غاړه نه دی اخیستی.
دا په داسې حال کې ده چې د شنبې په ورځ د جلال اباد اباد ښار د نوي کابل بانک مخې ته د یو ځانمرګي برید او چاودنو له امله شاوخوا ۳۷ تنه وژل شوي وو او ۱۲۵ تنه ټپيان شوي وو، چې مسولیت یې داعش وسله والې ډلې پر غاړه اخیستی.
