.jpg)
د راپورونو پر بنسټ کله، چې د کاناډا په "فورټ مک کوري" ښار کې اور ولګېد؛ د سختو او ګرمو بادونو له امله د دغه اور لمن دومره پراخ شوه، چې د یاد ښار ټول ۸۰ زره اوسېدونکي يې د کورونو پرېښودلو ته اړ کړل.
په نړيوالو رسنیو کې راغلي، چې یوازې تېره شپه ۴۴ زره تنو خپل کورونه پرې ايښي دي.
داسې هم ویل شوي، چې د خلکو د وتلو پر وخت د فورټ مک کوري ښار د سختو ترافيکي ستونزو او د لارو بندښت سره مخ شو.
د کاناډا البرتا ایالت په دې اړه د خپل هېواد له پوځه د نظامي مرستو غوښتنه کړې.
دغه اور لومړی د کاناډا د نفتو له سیمو څخه، چې د فورت مک کوري ښار په نوم مشهور دی، تېره یکشنبه پیل شو او د سختو بادونو له امله د ښار نورو برخو ته يې لمن وغځېدله.
د دې ښار د اطفايې رییس "داربي الن" وايي، چې د فورټ مک کوري په ختیځه سیمه کې د اور د لمبو له امله یوه سیمه په پوره ډول سوځېدلې او د دې ښار نورو برخو ته سخت زیانونه اوښتي دي.
دی وايي، چې د اور چټکو لمبو د ښار سویل ختیځه لار بنده کړې او د ښار اوسېدونکي د شمال لوري ته تللي دي.
د کاناډا هېواد چارواکي وايي، چې له دغه ښاره په دومره لویې کچې سره د خلکو لېږدول؛ د دې ایالت په تاریخ کې بې ساری ګڼل شوی دی.
د دغې اورلګېدنې له امله د وژل شویو، ټپيانو او مالي زیانونو په اړه تر اوسه کره جزیات په واک کې نه شته.
