په کابل کې د (بي) لیګ فوټبال سیالۍ پیل شوې
د افغانستان فوټبال فدراسیون وایي، چې په کابل کې یې د ۲۹ فوټبال لوبډلو ترمینځ د کابل ښار (بي) لیګ فوټبال سیالۍ پیل کړي دي.
د فوټبال فدراسیون له خوا سلام وطندار په رالېږل شوې خبر پاڼه کې راغلي، چې په دې سیالیو کې ګډون کوونکي لوبډلې په ۸ بیلا بیلو ګروپونو کې لوبیږي.
خبرپاڼه لیکي چې د هر ګروپ دوه مخکښې لوبډلې به یو پر اتم پړاو سیالیو ته لاره پیدا کړي چې ورپسې نیمه پای لوبې او بیا به اتله لوبډله په ډاګه شي.
د فوټبال فدراسیون خبرپاڼه زیاتوي چې د سیالیو په پای کې به ۲ مخکښې لوبډلې د کابل (الف) لیګ فوټبال سیالیو ته غوره شي خو دوه وروستۍ لوبډلې به د کابل (سي) لیګ سیالۍ ته مخکې کړی شي.
چارواکي وایي چې دغه سیالۍ هره ورځ ماسپښین مهال د کابل په غازي سټیدیوم کې ترسره کيږي
