د کرنې او مالدارۍ وزیر نصیراحمد دراني نن هرات ته پهخپل سفر کې د شاوخوا ۶۰ میلیونو افغانیو په ارزښت د هېواد د زعفرانو د لومړني انستیتیوت د بنسټ ډبره کېښوده.
ښاغلي دراني د زعفرانو د انیستیتیوت د رامنځته کولو موخه؛ تحقیق، ترویج او د افغانستان زعفرانو ته بازارموندنه وبلله. نوموړی وايي چې دغه انستیتیوت په دوو کلونو کې د کرنې وزارت له بودیجې بشپړ او ګټې اخېستنې ته سپارل کېږي.
ښاغلی دراني وايي چې د دې انستیتیوت د ودانۍ له جوړېدلو وروسته به ټول تجهیزات هم برابر شي.
د کرنې وزیر همداراز وايي، ترکیه په کال کې ۳۰۰ کیلو ګرامه زعفرانو ته اړتیا لري چې چې د اړتیا وړ دا زعفران به له افغانستانه وپېري چې دا به د هرات نه ورصادرېږي.
ښاغلی دراني زیاتوي، لهدې سره په خوا کې ترکان د هرات په زعفرانو د پانګونې مینهوال دي او غواړي تر پروسېس او بستهبندۍ وروسته یې د افغانستان په نامه نړۍوالو بازارونو ته صادر کړي.
په ورته وخت کې د هرات سرپرست والي محیالدین نوري وايي چې د ترکیې هېواد د زعفرانو په صادراتو ګمرکي تعرفې له ۳۰ سلنې صفر ته را ښکته کړېدي چې د افغانستان زعفران په اسانۍ دغه هېواد ته صادر شي.
په هرات کې د زعفرانو د انستیتیوت د بنسټ ډبرې اېښودلو ترڅنګ د څو کرنیزو پروژو ـ چې سربندونه، د اوبو کانالونه او د سلما بند د اوبو مدیریت په برخه کې دي ـ د هرات په بېلابېلو ولسوالیو کې د ۶۰۰ میلیونو افغانیو په ارزښت پیل شوې.
