د غور سیمه ییز چارواکي په دې ولایت کې د طالب وسله والو او داعش پلوه وسله والو تر منځ د جګړې خبر ورکوي.
د دې ولایت د والي ویاند عبدالحی خطیبي سلام وطندار ته وویل، چې د داعش پلوه وسله والو او طالبانو تر منځ له تېرې اونۍ راهیسې تر پرون شپې پورې جګړه روانه وه.
خطیبي وايي، چې دغه نښتې د غور مرکز فیروزکوه ښار او د چهارسده ولسوالۍ په کورګین کلي کې شوي دي.
د ویاند په خبره، په جګړه کې ۴ داعش پلوه وسله وال او ۵ طالب وسله وال وژل شوي او ۱۰ تنه نور له دواړو خواوو ټپیان شوي دي.
د والي ویاند وايي، د دغو وسله والو ډلو تر منځ نښته پای ته رسېدولې خو دواړه لوري یو بل ته د کمین په حالت کې دي.
خطیبي وویل، د طالبانو مشري ملا احمد شاه، چې د ملا هبت الله پلوی دی کوي او د داعش په پلوۍ ملا شاه ولي ټاکل شوی قوماندان دی.
دی وایي، وروسته له هغې دغو ډلو نښته وکړه، چې د ملا شاه ولي پلار احمد خان مرغابي د طالبانو له خوا ووژل شو.
نوموړی زیاتوي، دغه نښته په هغو سیمو کې شوي، چې د امنیتي ځواکونو په واک کې نه دي او سیمه ییز چارواکي په دې لټه کې دي، چې د قومي مشرانو په مرسته خلک د طالباني او داعشي مفکورې لرې وساتي.
طالبانو داعشیانو تر اوسه په دې اړه څه نه دي ویلي.
