د میدان وردګو د والي ویاند عبدالرحمن منګل سلام وطندارته وویل، چې په تېرو ۲۴ ساعتونو کې سلګونه وسله والو طالبانو د جلرېز ولسوالۍ په بېلابېلو پوستو بریدونه کړي وو، چې د ۱۶ طالب وسله والو په وژل کېدو او ۱۰ ټپي کېدو سره دغه نښته پای ته ورسېده.
منګل زیاته کړه، چې په دې نښه کې د درې ملکي کسانو په ګډون ۷ پولیس هم ټپیان شوي دي.
د والي ویاند همداراز وویل، چې د کابل ـ بامیانو لویه لار هم د مسافرو پر مخ پرانیستل شوې ده.
د منګل پر وینا، اوس هم په ولسوالۍ کې د وسله والو طالبانو پر ضد تصفیوي عملیات روان دي.
خو هاخوا بیا طالب ویاند ذبیح الله مجاهد ادعا کوي، چې په دې نښته کې يې ۵ امنیتي پوستې نیولي دي، د امنیتي خواکونو يو شمېر وسلې هم لاسته ورغلي او په لسګونو پولیسو ته يي مرګ ژوبه اړولې ده.
خو امنیتي ځواکونه بیا دا ادعا ردوي.
