شاوخوا درې اونۍ مخکې د اساسي قانون پر پلي کېدو د څار کمېسیون د غړي عبدالروف هروي په موجودیت کې د بامیانو په مرکز کې یو واټ او یو چوک د اساسي قانون په نوم ونومول شول.
خو د اساسي قانون په نوم د دغه واټ او چوک له نومولو څو ورځې وروسته د بامیانو ولایت یو شمېر اوسېدونکي د دې اقدام پر وړاندې راپورته شول او هغه یې د احمد شاه مسعود واټ او ابو حنیفه چوک په نومونو ونومول، چې دې موضوع وروسته په ټولنیزو شبکو کې جنجال جوړ کړ.
د بامیانو ولایت یو تن اوسېدونکی وزیر احمد ستیز د دغه واټ او چوک د نومولو په اړه وایي، چې دوی له یو شمېر بامیانیانو سره یوځای په ښې حکومتوالۍ کې د ولسمشر ځانګړي استازي له دفتره مکتوب راوړ، چې دغه واټ دې د احمد شاه مسعود په نوم ونومول شي؛ خو د بامیانو سیمه ییزې ادارې په دې برخه کې اقدام ونه کړ.
د ده په خبره، کله چې دا مسله د بامیانو سمه ییزې ادارې ونه څېړله؛ خلکو وویل، چې د دغه واټ نوم ځکه نه بدلوي، چې دا د دوی خپله سیمه ده او هغه سړک چې له دې سمیې تېر شوی؛ د دوی ۹۵ سلنه ځمکه یې نولې ده، ځکه یې حق کېږي، چې دا واټ د دوی د ملي او مذهبي شخصیتونو په نومونو ونومول شي.
بل خوا د بامیانو سیمه ییزه اداره د بامیانو په ښار کې د سړکونو رسمي نومول ردوي.
د بامیانو د والي ویاند عبدالرحمان احمدي سلام وطندار ته وویل، چې مخکې پر اساسي قانون د پلي کېدو د څار کمېسیون بامیانو ولایت ته وړاندیز کړی و، چې په بامیانو ولایت کې یو چوک او یو واټ د اساسي قانون په نومونو ونوموي، چې له وړاندیز وروسته د نومونې کمېسیون هوډ وکړ، چې دغه چوک په دې نوم ونوموي.
د بامیانو د والي ویاند دغه حرکت یو ولسي نه، بلکې سیاسي فعالیت بولي او وايي، چې له پخوا څخه دا کار پلان شوی او یو ډله خلک د قوم او مذهب په جامو کې پروژهيي کارونه کوي.
که څه هم احمدي د مشخصو کسانو نومونه وانهاخیستل؛ خو ویې ویل، چې د بامیانو سیمه ییزه اداره به په راتلونکي کې د دغو کسانو نومونه رسنیو ته په ډاګه کړي.
په همدې حال کې د بامیانو ولایت اطلاعاتو او فرهنګ ریاست هم وايي، چې د دغه واسټ او چوک د نومونې په اړه یې له دې وړاندې کوم مکتوب نه و ترلاسه کړی او له دوی سره یوازې چوک او سرک رسمیت لري.
ویل کېږي، چې له پلازمېنې وروسته دا دویم واټ او چوک دی، چې د اساسي قانون په نوم نومول کېږي.
