پنجشیر محلی مسئوللری نینگ ایتیشلریچه، سونگی بیر آیده کمیده 200 مینگ کیشی بو ولایت گه کیرگن. اولرگه کوره، کرونا ویروسی کینگهیب و کابل شامل قطار شهرلر قرنطین قیلینگنیدن کیین، کابل و باشقه ولایتلرده یشهیدیگن پنجشیر یشاوچیلری، کرونا ویروسی گه چلینمهسلیکلری اوچون قیتهدن پنجشیر کیلگنلر.
مملکتده کرونا ویروسی گه کینگهیگن بیرحالده، پنجشیر محلی مسئوللری قویاش 1398- ییل 26- حوت بو ولایتده کیلیب-کیتیش یوزیگه چیکلاو یرهتدی.
پنجشیر حاکمی سوزلاوچیسی محمد منصور عنابی نینگ سلاموطندارگه ایتیشیچه، بو ولایتده کیلیب-کیتیش یوزیگه چیکلاو یرهتیلگنیدن بیر آی اوتماقده کیم بو پیتده باشقه ولایتلر و مملکتلرده یشهیدیگن پنجشیر یشاوچیلری کرونا ویروسی گه چلینیش خوفی باعث بو ولایت گه پناه کیلتیرگن.
پنجشیر ولایتیده کرونا ویروسی گه جواب بیرهدیگن کمیته مسئولی داکتر رحیمداد نینگ ایتیشیچه، حاضرگچه دشتک منطقهسیده 50 یاتاقلی بیر ساغلیک مرکزی محلی حکومت آرقهلی قوریلگن و شونینگدیک داکترلر هم جهازلنگن.
اونینگ ایتیشیچه، بو ولایت یشاوچیلریگه معلومات بیریش گه علاوه، ساغلیک مرکزلرنینگ جهازلنتیریش اوچون 13 میلیون افغانی مذکور ولایت تومنلریگه اختصاص بیریلگن.
رسمی رقملر اساسیده، پنجشیر ولایتیده حاضرگچه 7 کیشی کرونا ویروسی گه چلینگن. افغانستان ده حاضرگچه 1463 کیشی کرونا ویروسی گه چلینگن کیم بولردن، 47 تهسی جان بیرگن.
