آمریکا تشقی ایشلر وزیری مایک پمپئو، افغانستان‌ده مصلحتی لویه جرگه یولگه قوییلیشی نی خوش قرشی‌لب ایتیشیچه، آمریکا بوگونگی جرگه‌ده قتنشگن‌لردن «تینچلیک‌دن ملی حمایت نی کوچ‌لنتیریش اوچون» قدردانلیک قیله‌دی.
جناب مایک پمپئو نینگ ایتیشیچه، مذکور جرگه اشتراکچی‌لری افغانستان‌لیکلرارا سوزلشوولر یولگه قوییلیشی گه توسیق بولگن طالبان محبوس‌لری نینگ قوییب یوباریلیشی حقیده قرار آلیشه‌دی.
تینچلیک مصلحتی لویه جرگه ۳۴ ولایتدن ۳۲۰۰ کیشی نینگ حضوری بیلن طالبان گروهی نینگ ۴۰۰ محبوسی نی تقدیری خصوصیده قرار آلیش اوچون بوگون (جمعه ۱۷- اسد) کابل ده یولگه قوییلگن.
آمریکا تشقی ایشلر وزیری نینگ ایتیشیچه: «طالبان گروهی مذکور محبوسلر قوییب یوباریلگنیدن کیین افغانستان هیاتی بیلن صحبت اوتکزیش اوچون سوز بیرگن.»
پمپئو گه کوره، شونینگدیک طالبان گروهی سوزلشوولر جریانیده ایکی تامان اوروش نی یکونلنتیریش اوچون سیاسی بیر یول اوستیگه کیلیشب و دایمی آتیش کیسین خصوصیده کیلیشیش اوچون زوروانلیکلر کمه‌یتیریلیشی گه تعهد بیرگن.
اعلامیه نینگ کوپه‌یتیریشیچه، آمریکا مصلحتی لویه جرگه اشتراکچی‌لری و افغانستان رهبرلری شامل جمهوررییس غنی و ملی مصالحه عالی کینگش باشلیغی عبدالله عبدالله دن اوشبو تاریخی فرصت‌دن منطقه و دنیا تینچلیگی اوچون یخشی فایدهلنیشلرینی سوره‌یدی.
شونینگدیک افغانستان تینچلیگی بوییچه آمریکا خاص نماینده‌سی زلمی خلیلزاد، تینچلیک مصلحتی لویه جرگه یولگه قوییلگنیدن حمایت قیلدی.
جناب خلیلزاد بیر توییت آرقه‌لی مذکور جرگه نی تینچلیک سوزلشوولری برابریده‌گی توسیق‌لرنی اورته‌دن ایلتیش اوچون تاریخی بیر فرصت دیب ایتیشیچه: «ایجابی نتیجه زوروانلیکلر کمه‌یشی و افغانستان‌لیکلر مذاکره میزی گه ییغیلیش معناسیگه کیلیشی ممکن.»
