د کابل سلګونو اوسېدونکیو تېره شپه پر جاغوري، مالستان او روزګان ولسوالیو د طالبانو بریدونو پروړاندې اعتراض وکړ او په یادو ولسوالیو کې یې د امنیت ټینګښت غوښتنه کوله.
اعتراضکوونکیو چې د حکومت ـ حکومت، امنیت ـ امنیت؛ جاغوري ـ مالستان او روزګان ـ روزګان شعارونه یې ورکول، د ارګ تر دروازې ځان ورساوه.
بلخوا په بلخ، بامیان او غزني ولایتونو کې هم خلک سړکونو ته راووتل او له حکومت یې غوښتنه کوله چې د خلکو ژوند خوندي کړي.
په جاغوري، مالستان او خاصروزګان ولسوالیو کې د هوايي عملیاتو په اړه د فرمان ورکول، جګړهځپلیو سره بېړنۍ مرستې، په لویو لارو کې د امنیتي پوستو جوړول، په مرکزي سیمو کې د دایمي قولاردو جوړول او د ولسمشر د مخکنیو ژمنو عملي کول، د اعتراضکوونکیو بنسټیزې غوښتنې وې.
دوی خبرداری ورکړ، که حکومت یې غوښتنې و نه مني، خپل اعتراضونه به پراخ کړي.
د کابل پوهنتون یوشمېر محصلانو هم د اعتراض په توګه خپلې زدهکړې پرې ايښي او سړکونو ته راوتلي دي.
په همدې حال کې لوی درستیز محمدشریف یفتلي نن په کابل کې د یوې خبري غونډې پرمهال وویل چې د افغان ځواکونو په هوايي بریدونو کې طالبانو په مالستان ولسوالي کې مات شوي او د ولسوالي له مرکزه لرې شوي دي.
د نوموړي په وینا، د ملي امنیت ۴۰ ځانګړي ځواکونه او ۳۵ کومانډویان چې په پرمختللیو تجهیزاتو سمبال دي، سره جاغوري ولسوالي ته لېږل شوي دي.
د کابل ګارنېزیون قومندان مرادعلي مراد چې د اعتراضکوونکیو منځ ته ورغلی و وویل چې ولسمشر په جاغوري او مالستان ولسوالیو کې د چاڼیزو عملیاتو لارښوونه کړې ده.
نوموړي خبرداری ورکړ، که حکومت د اعتراض کوونکیو غوښتنې ونه منلې، دی به له خپلې دندې استعفا وکړي. مراد ژمنه وکړه چې ولسمشر به هم د رسنیو له لارې په مستقیم ډول له اعتراضکوونکیو سره خبرې وکړي.
طالبانو له تېرو څو اوونیو راهیسې پر خاص روزګان ولسوالیو بریدونه پیل کړي چې د رسمي شمېرو له مخې تراوسه یې ۶۳ ملکیانو ته مرګژوبله اړولې ده.
دغه راز طالبانو ۶ ورځې وړاندې د غزني پر جاغوري ولسوالي هم برید وکړ چې حکومت لږ شمېر ځانګړي ځواکونه ورته استولي چې له ډلې یې ۱۰ ځانګړي ځواکونه له ۱۵ ملکیانو سره د تېرې ورځې په برید کې ووژل شول.
